Çитес çырав кăтартăвĕсем регионсене пурăнмалли çуртсем тата социаллă объектсем тумалли программăсене улшăнусем кĕртме, çĕннисене йышăнма май парĕç.

2010 çулхи çырав кăтартăвĕсемпе, виçĕ çынран тăракан кил хуçалăхĕнче, калăпăр, кашнине хваттерте вăтамран 17 тăваткал метр тивнĕ, харпăр хăй çурчĕсенче – 21, коммуналкăра – 10 метр. Раççейĕпе вăтамран пÿлĕмсенче 1,2 çын пурăннă.

Çитес çырав даннăйĕсем кашни уйрăм çын пирки пĕлтермеççĕ, пĕтĕмĕшле кăтартусем параççĕ. Вĕсем тăрăх регионсемпе муниципалитетсенчи пурăнмалли çуртсен лаптăкĕпе калăпăшĕ, пахалăхĕ, хăтлăх мелĕсем, санитарипе гигиена условийĕсем çинчен пĕлетпĕр. «Вĕсем вара халăх, арçынсемпе хĕрарăмсен йышне шута илсе регионсен ертÿçисене пурăнмалли çуртсем, социаллă объектсем тăвассине, вĕсем патне коммуникаци тытăмĕсене илсе пырассине тĕплĕнрех планлама, хваттерсемпе çуртсенчи хăтлăха лайăхлатма пулăшĕç», – тенĕ Раççей статистикин ертÿçин çумĕ Павел Смелов.

Статистика даннăйĕсемсĕр ĕçлени тĕттĕмре куçа хупласа çÿренĕ пекех. Паян эпир 2010 çулхи кивелнĕ кăтартусемпе усă куратпăр. Унтанпа нумай улшăну пулса иртрĕ. Халăх шучĕ кăна мар, арçынсемпе хĕрарăмсен йышĕ те халĕ регионсенче урăхларах. Вăл мĕнлерех улшăнса пынине çырав тĕп-тĕрĕс кăтартса парĕ. Ун тăрăх влаç органĕсем уйрăм вырăнсем мĕнле аталанса пынине ăнланĕç тата пулăшу мелĕсене палăртĕç. Хăш районта больница, фельдшерпа акушер пункчĕсем, библиотекăсемпе музейсем, клубсемпе вĕрентÿ учрежденийĕсем çитменнине тÿрех яр уççăн курĕç.

Раççей статистики аса илтерет% çырава хутшăнма нимĕнле документ та кирлĕ мар (хуравсене кам мĕнле калать, çавăн пек çырса хураççĕ). Харпăр хăй пирки нимĕнле даннăй та ниçта та каймасть (пуçтаракан кăтартусенчен хурав паракан пирки пĕлме май çук). Çынсен тупăш калăпăшне ыйтмаççĕ, унăн çăлкуçĕ кăна интереслентерет% «ĕç укçи», «предприниматель тупăшĕ», «пенси», «пособи»... Пĕтĕмĕшле кăтартусем çĕршыври, уйрăм районсенчи лару-тăрăва хак пама кирлĕ.

Пĕтĕм Раççейри халăх çыравĕ 2021 çулхи октябрĕн 15-мĕшĕнчен пуçласа ноябрĕн 14-мĕшĕччен пырать, цифра технологийĕсемпе усă курса иртет.