Шупашкарта Трактор тăвакансен культура керменĕнче «Тухтăрсене тав» акци иртнĕ. Ăна Чăваш ен Пуçлăхĕ, Правительство, республикăри Хĕрарăмсен союзĕ, «Пĕрле» аталану фончĕ тата «Пулăшма вăхăт» ыркăмăллăх фончĕ тăрăшнипе йĕркеленĕ.

Мероприятие Чăваш Республикин Министрсен Кабинечĕн Председателĕн заместителĕ – сывлăх сыхлавĕн министрĕ Владимир Степанов уçнă. Медицина ĕçченĕсене пархатарлă ĕçшĕн ырă сăмахсем каланă. Гиппократ тупине асра тытакансене çавăн пекех Патшалăх Канашĕн председателĕ Леонид Черкесов, Савватий митрополит, Патшалăх Думин комитечĕн председателĕ Анатолий Аксаков, Раççей Федерацийĕн сенаторĕ Николай Владимиров тав тунă.

Тăрăшнине кура хисепĕ. Мероприятире коронавируспа хастар кĕрешнĕ медицина ĕçченĕсене чысланă.

Вăрнар район тĕп больницин клиникăпа диагностика заведующийĕ Зоя Викторовна Жилкина та хисепе тивĕçнĕ. Ăна ведомствăн Тав çырăвĕпе наградăланă. Зоя Викторовна Вăрнар район тĕп больницинче чылай çул ырми-канми тăрăшать. Ĕçтешĕсене ырă тĕслĕх кăтартать, пациентсемпе пĕр чĕлхе тупма пĕлет.

Елена ПОРФИРЬЕВА.