Эпир пурте хамăрăн Тăван çĕршывăн гражданĕсем. Çак-на чи малтан тĕп документ – Раç-çей паспорчĕ – çирĕплетет. Ăна пĕрремĕш хут алла тытнă самант, паллах, кашниншĕн пурнăçра чи пĕлтерĕшлисенчен пĕри.

Чĕрери ку пăлханăва эрнекун районăн 10 çамрăкĕ те туйса илчĕç пулĕ. Вĕсене, 14 çул тултарнăскерсене, Раççей паспорчĕсене хумхануллă лару-тăрура, ЗАГС пайĕн илемлĕ залĕнче, пачĕç.

Мероприятие пысăк уяв тĕлне йĕркеленĕ. Декабрĕн 12-мĕшĕнче пĕтĕм çĕршывшăн паллă кун – Конституци кунĕ. ЗАГС пайĕн ертÿçи Татьяна Филиппова çамрăксене, вĕсен ашшĕ-амăшне, чĕннĕ хăнасене ку праçнике мĕнле паллă тума тытăннипе, паспорт историйĕпе паллаштарчĕ. Вăл çыннăн пурнăçĕнче мĕнле вырăн йышăннине ăнлантарчĕ.

– Паспорт эсир çĕршывăн мĕнпур правиллĕ гражданинĕ пулнине, анчах çав вăхăтрах хăвăр çине пысăк тивĕçсене илнине çирĕплетет. Ку документ – общество, Раççей умĕнчи яваплăхăн, эсир аслă пурнăç çулĕ çине тăнин символĕ, – ку пулăмăн пĕлтерĕшне палăртрĕ Татьяна Витальевна.

Пĕрремĕш официаллă документа илнĕ ятпа ачасене хăнасем те саламларĕç. Полицин «Вурнарский» пайĕн пуçлăхĕ Дмитрий Фирсов, миграци ыйтăвĕсемпе тимлекен уйрăмĕн ертÿçи Юлия Ильина, район администрацийĕн йĕркелÿ, кадрсемпе юридици службин пайĕн пуçлăхĕ Алина Константинова тата район прокурорĕн аслă помощникĕ Лариса Спиридонова çак кун пурнăç тăршшĕпе асра юлмаллине каларĕç. Çамрăксене хăйсен малашнехи ĕç-хĕлĕпе, патриотлăхĕпе, яваплăхĕпе çĕршывăн мăнаçлăхне ÿстерекенсем пулма сунчĕç.

– Шăпах эсир – Раççей малашлăхне çыраканĕсем. Çак тивĕçе яланах чыслăн тытса пырăр, – терĕ Дмитрий Фирсов полици подполковникĕ çĕнĕ паспортсене çамрăк хуçисене панă май.

Паллă событие тăван тĕпренчĕкĕсемпе пĕрле ашшĕ-амăшĕ те пайларĕ. Кашнин чун-чĕри хăйĕн ывăлĕ-хĕрĕшĕн савăнăçпа тулчĕ.

Ирина ЯКОВЛЕВА.