Педагогсен çулленхи августри конференцийĕ кăçал пĕлтерĕшлĕ тема тавра çаврăнчĕ: паянхи кун чĕнĕвĕ тата Раççей вĕрентÿ системин суверинитечĕн çирĕплĕхĕн условийĕсенче округра ку тытăма аталантарасси.

Иртнĕ вĕренÿ çулне пĕтĕмлетме тата малашлăх планĕсене палăртма районти культура çуртне 200 ытла педагогика ĕçченĕ пухăнчĕ. Шăпах вĕсем ĕнтĕ - çитĕнекен ăрăва пĕлÿ тĕнчине илсе кĕрекенсем.

Юлашки вăхăтра учительсене пулăшма тĕрлĕ мерăсем ĕçлеме тытăнчĕç. Вĕсем çине хурăннă бюрократи тиевне чакарассипе ĕçлеççĕ. Кун пирки Раççей вĕрентÿ министрĕ Сергей Кравцов хăйĕн видеосаламĕнче палăртрĕ. Çавăн пекех вăл вĕренÿ планне кĕрекен çĕнĕлĕхсем, вĕренÿ организацийĕсен инфраструктурине лайăхлатас плансем çинче чарăнса тăчĕ.

Раççей Патшалăх Думин депутатĕнчен те çитрĕç саламлă сăмахсем. «Августри конференци - çĕнĕ ĕçсене палăртакан вăхăт. Вăл çутă уява - çитĕнекен ăрăва пĕлÿпе туслаштаракан куна çывхартать...» - тенĕ вăл унта.

- Çирĕп пĕлÿ панипе пĕрлех ачасене кăмăл-сипет воспитанийĕ çине тимлĕх уйăрни питĕ пĕлтерĕшлĕ. Сирĕн вĕренекенсем урамра сывлăх сунма пĕлеççĕ пулсан, эсир вĕсене пысăк ĕç хывнă, - терĕ Вăрнар округĕн пуçлăхĕ Надежда Никандрова. Вăл паян хамăр тăрăхра вĕрентÿ тытăмне пысăк пулăшу панине каларĕ. Округ бюджечĕн çурри шăпах ку сферăна пырса тивет. Вăл вĕренекенсене ĕçе, ачасене юратма ыйтрĕ, çакăн чухне кăна çитĕнÿсем пулассине палăртрĕ.

Чăваш ен Патшалăх Канашĕн депутачĕн Владимир Свешниковăн сăмахĕсем те кашнин чĕрине кĕрсе вырнаçрĕç, ахăртнех. «Вĕренÿре çиле май ишме юрамасть, унсăрăн хумсем айне пулма пулĕ», - терĕ вăл.

Чăн та, тăрăшмасăр, талпăнмасăр çирĕп пĕлÿ илеймĕн. Тĕллеве лартнисем вара яланах малта пыраççĕ. Хамăр шкулсенчех чылаййăн вĕсем - вĕренÿре те, спортра та ĕлкĕрсе пыракансем. Округ пуçлăхĕн заместителĕ - вĕрентÿ пайĕн пуçлăхĕ Алексей Фирсов хăйĕн пĕтĕмлетÿллĕ докладĕнче вĕсене ятранах асăнчĕ. Пурнăçланă ĕçсемпе пĕрлех малашнехи плансене те палăртрĕ, уйрăмах тимлĕх уйăрмалли ыйтусене мала кăларчĕ.

Куратпăр ĕнтĕ, шкулсем çулсеренех юсавсенче çĕнелеççĕ. Кăçал, ак, Кĕçĕн Кипек шкулĕ ?çурчĕ Туçи Çармăсра вырнаçнă% тĕплĕ юсав хыççăн ачасене хăйĕн ытамне илет.

Вăрнарти 2-мĕш шкул территорийĕ те пысăк юсавра çĕнелет. Кунта тахçанах кĕтнĕ спорт площадкисем вырнаçтарĕç. Пĕтĕмĕшле ĕç хакĕ - 24,822 млн тенкĕ, вăл шутран 20,620 млн тенки - республика бюджетĕнчен, 1,552 млн тенки - вырăнти бюджетран, 2 млн та 650 пин тенкине Вăрнарти хутăш препаратсен завочĕ хывнă.

Калининăри вăтам шкул территорине хăтлăлатма та пысăк укçа уйăрнă - 11 млн ытла тенкĕ.

Пĕтĕмпе вара вĕренÿ организацийĕсене çĕнĕ вĕренÿ çулне хатĕрлеме мĕнпур шайри бюджетран 82 млн ытла тенкĕ уйăрнă.

Юлашки çулсенче шкулсенче «Движение первых» юхăм вăй илчĕ. Ярмушкари ушкăн, ак, Вăрнарти 2-мĕш шкулпа пĕрле Раççейри конкурсра çĕнтерме пултарнă. Ачасене обществăлла ĕçе явăçтарас опытпа ку шкул советникĕ Любовь Максимова паллаштарчĕ.

Педагогсен конференцийĕ яланхиллех наградăсемпе пуян пулчĕ.

Вĕрентÿ ĕçĕнчи тивĕçлĕ ĕçсемшĕн Вăрнарти И.Н.Никифоров ячĕллĕ 1-мĕш шкул директорĕ Румия Рашидовна Басырова тата Аçăмçырми шкулĕн директорĕн çумĕ Валентина Павловна Васильева «Раççей Федерацийĕн вĕрентÿ сферин хисеплĕ ĕçченĕ» ята тивĕçнĕ.

Раççей Çутĕç министерствин Хисеп грамотипе Хапăс шкулĕн вырăс чĕлхипе литература учительне Олег Юрьевич Ефремова, «Рассвет» спорт шкулĕн тренер-преподавательне Галина Александровна Павлована, Калинино шкулĕн физкультурăпа технологи учительне Надежда Владимировна Тикиневана наградăларĕç.

Чăваш Республикин Вĕрентÿ министерствин Хисеп грамотисене илнисем: Хапăс шкулĕн социаллă педагогĕ Надежда Викторовна Алексеева, Çĕрпел шкулĕн кĕçĕн классен учителĕ Надежда Ильинична Гаврилова, Аçăмçырми шкулĕн историпе обществознани учителĕ Светлана Микояновна Ильина, Вăрнарти 2-мĕш шкул учителĕ Рустам Асхатович Салахутдинов, Кÿстÿмĕр шкулĕн кĕçĕн классен учителĕ Альбина Маркеловна Федорова.

Вăрнар округĕн администрацийĕн Хисеп грамотипе Ярмушка шкулĕн физкультура учительне Владимир Васильевич Афанасьева тата Çĕрпел шкулĕн технологипе ИЗО учительне Надежда Викторовна Андреевана чысларĕç. Тавĕпе - Малти Ишек шкулĕн кĕçĕн классен учительне Ирина Владимировна Никитинана тата Вăрнарти 1-мĕш шкулăн технологи учительне Лариса Анатольевна Семенована.

Округăн Вĕрентÿ пайĕнчен те наградăсем пулчĕç. Хисеп грамотипе Ирина Андреевна Кассирова ?3-мĕш «Ромашка» ача сачĕ%, Сергей Валерианович Михайлов ?Ярмушка шкулĕ% тивĕçрĕ. Тавне - Татьяна Ильинична Данилова ?Вăрман Кипек шкулĕ%, Елена Виссарионовна Захарова ?Çĕрпел шкулĕ%, Инна Васильевна Игнатьева ?вĕрентÿ пайĕн методисчĕ%.

Вĕрентÿ ĕçченĕсен республикăри профсоюз комитечĕн наградисене илнисем: Александр Геннадьевич Чернов ?1-мĕш шкул%, Лариса Николаевна Иванова ?Санарпуç шкулĕ%, Петр Яковлевич Золов ?Мăн Явăш шкулĕ%, Людмила Германовна Иванова ?Çĕньял Хапăсри «Ивушка» ача сачĕ%.

Обществăпа политика пурнăçне хастар хутшăннăшăн Владимир Свешников депутат Кĕçĕн Кипек шкулĕн директорĕн тивĕçĕсене пурнăçлакан Сергей Александрович Ермошкина, вĕрентÿ пайĕн методистне Инна Васильевна Игнатьевана тата Çĕрпел шкулĕн истори учительне Нелли Евгеньевна Игнатьевана «Единая Россия» партин Тав хучĕпе чысларĕ.

Çавăн пекех вăл парламентри ĕçтешĕн Роман Алексеевăн Тав çырăвĕсене те çитерчĕ. Вĕсене Калинино шкул директорĕ Дина Георгиевна Петрова, Вăрнарти 2-мĕш шкулти биологи учителĕ Анастасия Александровна Майорова, Вăрнарти 1-мĕш шкулти физикăпа информатика учителĕ Дмитрий Евгеньевич Чарков илчĕç.

Вĕрентекенсене «Семь нот» ача-пăча ушкăнĕ тата «САЛАМ» ансамбль саламларĕ.

Светлана ЧИКМЯКОВА