Юнкун республикăра, çав шутра пирĕн округра та, Пĕрлехи информаци кунĕ иртрĕ. Чăваш ен конкурентлă политика тата тарифсем енĕпе ĕçлекен патшалăх службин ертÿçин çумĕ Алина Елисеева, округ пуçлăхĕ Надежда Никандрова ертсе пыракан информушкăн чи малтан Ершепуç территори пайĕнче пурăнакансемпе тĕл пулчĕ.

Хураçырмари культура çуртне пĕлтерĕшлĕ ыйтусене сÿтсе явма халăх йышлăн пухăнчĕ.

Тĕп темăсенчен пĕри - пуçаруллă бюджет программине пурнăçласси. Кун пирки Надежда Никандрова каласа кăтартрĕ. Яллă тăрăхсенче пурăнакансен пуçарулăхĕ, тăрăшулăхĕ ÿсĕм-çитĕнÿ тума пулăшнине палăртрĕ. Кăçал Вăрнар округĕнче пуçаруллă 35 проекта 47 миллион тенкĕлĕх пурнăçланă. Çитес çул 49 проекта ĕçе кĕртмелле. Калас пулать, вăл-ку проект çĕнтертĕр тесен «Госуслуги» порталта сасăламалла.

Палăртмалла, кăçал Хураçырмара пуçаруллă бюджет программипе пĕр ĕç те туман. Патшалăх Канашĕн депутачĕ Роман Алексеев ял çыннисене хастартарах пулма сĕнчĕ. Пуçаруллă бюджет программи халăх пурăнакан тăрăха хăтлăлатма çул уçнине çирĕплетрĕ. Ершепуç территори пайĕн пуçлăхĕ Эрколий Молчанов çитес çулхи ĕç планĕпе паллаштарчĕ. Патшалăх пулăшăвĕ пĕчĕк тата вăтам предпринимательлĕхе аталантарма та пулăшать. Акă, «Чăваш Республикин экономика аталанăвĕ» программăпа килĕшÿллĕн 12 енпе пулăшăва тивĕçме пулать. Кун пирки округ пуçлăхĕн заместителĕ Светлана Шашкарова каласа кăтартрĕ.

Сывлăх - пуянлăх, теççĕ. ГТО нормативĕсене пур ÿсĕмри граждансем те пурнăçлама хутшăнма пултараççĕ. Культура пайĕн пуçлăхĕн заместителĕ Сергей Политов çирĕплетнĕ тăрăх, ГТО нормисене пĕтĕмпе округри 8456 çын пурнăçланă, 3410-шĕ ылтăн палла тивĕçнĕ.

Компьютерпа технологи ĕмĕрĕнче мушенниксем пачах та тĕлĕрмеççĕ. Банкран кивçен илтереççĕ, пухнă нухратсăр та хăвараççĕ. Информкуна килнисене ултав мелĕсем тата вĕсене сирмелли майсем пирки шалти ĕçсен «Вурнарский» пайĕн пуçлăхĕн çумĕ Лилия Забирова каласа кăтартрĕ. Полицейскисем профилактика ĕçĕсене чылай ирттереççĕ, ахальтен мар аферистсен капкăнне лекекенсем пирĕн округра сахалланнă. Çапах та хальхи саманара кашни утăмрах асăрхануллă пулмаллине Лилия Рамиловна темиçе хутчен те асилтерчĕ. Телефонпа ют çынпа калаçнă чух тимлĕхе çухатмалла мар, терĕ.

Асăрхав тата профилактика ĕç-хĕлĕпе тимлекен пай пуçлăхĕ Алексей Петров пушар хăрушсăрлăхĕн теми тавра тĕплĕн калаçрĕ. «Хĕрлĕ автан» аташсан кил хуçалăхĕнче нимĕн те юлмасть, этемĕн кун-çулĕ те татăлма пултарать. Кашни информкунрах халăха пушар хăрушсăрлăхĕн правилисене çирĕп пăхăнмаллине, газ приборĕсемпе пĕлсе усă курмаллине асилтереççĕ.

Пĕрлехи информаци кунĕнче влаçпа халăхăн куçа-куçăн калаçма майсем çителĕклĕ. «Хăюллăрах пулăр, хăвăра кăсăклантаракан ыйтусене уççăн калăр», - терĕ Надежда Никандрова. Акă, хураçырмасене медпунктра фельдшер çукки пăшăрхантарать. Çул-йĕр ыйтăвĕ те çивĕч, çырма урлă кĕпер те хывмалла. Вырăнти клуба та çĕнĕ сăн-сăпат кĕртмелле.

2025 çулта Ершепуç тăрăхĕнче çул-йĕрпе çыхăннă пĕр проекта пурнăçа кĕртме палăртаççĕ.

Информушкăн Кульцавра та пулчĕ. Ял халăхĕ хускатнă кашни ыйтăва тимлĕхе илчĕ.

Елена ПОРФИРЬЕВА