2005 çултанпа хаçат редакцийĕн коллегийĕ чăваш халăх писателĕн Анатолий Емельяновăн çуралнă кунĕнче ун ячĕллĕ преми лауреатне çирĕплетет. Кăçал ят-сума «Çĕнтерÿ çулĕн» Хурăнсур Çармăсри обществăлла корреспонденчĕ, Чăваш наци ăс-хакăлĕпе ÿнер академийĕн членĕ, таврапĕлÿçĕ Федор Григорьевич Кузьмин тивĕçрĕ.

Редколлеги темиçе кандидатран Федор Григорьевича вăл пичет изданийĕпе нумай çул тачă çыхăну тытнăшăн, ăста çырнă статйисемпе, очеркĕсемпе вулакансене тăтăшах паллаштарнăшăн, паттăрлăх темине çутатассипе тĕллевлĕ тăрăшнăшăн суйласа илчĕ. Унăн кашни материалĕ вулакансен чĕрине хускатать. Хаçатра Федор Григорьевичăн вăрçă паттăрĕсемпе ĕç ветеранĕсен хастарлăхне, Вăрнар енчи ял хуçалăх производствин аталанăвне, ятлă-сумлă ентешсен пархатарлă кун-çулне халалланă чылай статья пичетленчĕ. Федор Кузьмин Сăр тата Хусан хÿтĕлев чиккисене çĕкленĕ çĕрте ĕçленисен списокне хатĕрлессипе те нумай вăй хучĕ. Тыл ĕçченĕсен тăванĕсем, тăван ен историйĕпе кăсăкланакансем хаçатăн çĕнĕ кăларăмĕсене чăтăмсăррăн кĕтрĕç, редакцине те кашни кун тенĕ пекех шăнкăравлатчĕç. «Вăрнарсем - ĕç фрончĕн паттăрĕсем» кĕнеке пиçсе тухнинче ун тÿпи пысăк.

Хальхи вăхăтра Федор Кузьмин хатĕрленĕ «Тăван çĕршывăн 1941–1945 çулсенчи Аслă вăрçинче хастар ĕçленĕшĕн» медале тивĕçнисен списокĕ хаçат страницисенче кун çути курать. Тĕпчев ĕçĕсенче архив докуменчĕсемпе туллин усă курать вăл. Таврапĕлÿçĕ тăван халăхăн кун-çулне тĕпчессипе хастар ĕçлет. Федор Кузьмина 2021 çулта Чăваш наци ăслăлăхĕпе ÿнер академийĕн президенчĕн хушăвĕпе Аркадий Айдак ячĕллĕ «Халăхшăн тăрăшнăшăн» орденпа наградăланă. Федор Кузьмин - «Хорнзор Çармăс ялĕ», «Хорнзор Çармăссен вĕçĕмсĕр историйĕ» ?очерксем, асаилÿсем%, «Кĕтнĕ салтаксем», «Хорнзор-Берлин 1941- 1945» изданисен авторĕ те.

Федор Григорьевич анлă тавракурăмлă, ырă та сăпайлă, тÿрĕ кăмăллă та пултаруллă, ĕçшĕн çунакан тата тăван çĕре чунтан юратакан çын. Нумай çул «Хорнзор» кооператив тилхепине ăнăçлă тытса пынă, «Янгорчино» хуçалăх председателĕнче те тăрăшнă. Ăна «Чăваш Республикин тава тивĕçлĕ агрономĕ», «Чăваш Республикин ял хуçалăхĕн тава тивĕçлĕ ĕçченĕ» хисеплĕ ятсемпе чысланă. Федор Григорьевич ертÿçĕ чухне ялсене хăтлăх кĕртессипе, «кăвак çулăм» çитерессипе, çамрăк специалистсен çурт-йĕр условийĕсене лайăхлатассипе тăрăшса ĕçленĕ. Культура, спорт мероприятийĕсене йĕркелессине те тимлĕхре тытнă, концертсене, спектакльсене хастар хутшăннă. Çамрăк чухнех литература лаççинче пултарулăха туптама пуçланă, драматурги хайлавĕсене çырнă. Ăна 2003 çулта Чăваш ен Патшалăх Канашĕн депутатне те суйланă, хăйĕн тивĕçне яваплăха туйса пурнăçланă. Аграри политики тата экологи енĕпе тимлекен комитетăн членĕ пулнă. Федор Григорьевич спорт мастерĕн кандидачĕ. Сывă пурнăç йĕркине паянхи кун та çирĕп тытса пырать. Йĕлтĕр спортне кăмăллать.

Федор Кузьмин «Çĕнтерÿ çулĕ» хаçатăн чи шанчăклă та çывăх тусĕсенчен пĕри. Вăл яланах пуян содержаниллĕ материалсемпе тивĕçтерет. Редакци коллективĕ Анатолий Емельянов ячĕллĕ премийĕн çĕнĕ лауреатне Раççей тата Чăваш пичечĕн кунĕ ячĕпе чун-чĕререн саламлать, яланах çирĕп сывлăхлă пулма, пултарулăхра малалла та çитĕнÿсем тума сунать.

Елена ПОРФИРЬЕВА