Кăçалхи сезона Хапăс çамрăкĕ Михаил Скворцов чаплă результатпа вĕçлет. Республикăри сумлă ăмăртусен вунвиçĕ стартĕнчен вуннăшĕнче вăл ылтăн медале тивĕçнĕ, виççĕшĕнче – «кĕмĕле».

Республика шăйĕнчи йĕлтĕр сезонне иртнĕ шăматкун Канаш районĕнче Геннадий Смирнова асăнса ирттернĕ чупура хупнă.

Вăрнарсем унта вăйлă ăмăртнă. Мăньял Хапăс хĕрĕсем: Настя Тикинева 1-мĕш, Валя Тикинева 2-мĕш вырăнсене йышăннă. Миша Скворцов – 3 километрта финиша пĕрремĕш çитнĕ çеç мар, ытти районсенчи ачасемшĕн ырă тĕслĕх те пулса тăнă. Тренерсем вăл тăвайккине çиçĕмле хăпарнине тĕлĕнсе пăхса тăнă. «Вăт, çапла ĕçлемелле!» – вĕрентнĕ вĕсем хăйсен воспитанникĕсене.

Мишăн тренерĕ, Михаил Павлович Павлов, кунашкал талантлă ачасем темиçе ăрура шутлă çеç пулнине палăртать. 43 çул ытла кĕçĕннисене йĕлтĕрпе туслаштараканскер, пĕлет ĕнтĕ – камăн малашлăх пур. Ун шкулĕнчен пултаруллă йĕлтĕрçĕсем чылай тухнă. Юрий Тикиневпа халĕ ак ăмăртмалла, алла-аллăн ĕçлеççĕ. Юрий Александровичăн чунĕ пысăккине палăртать Михаил Павлович – районти мĕнпур тренер ун патĕнче йĕлтĕрсене «çула тухма» хатĕрлеççĕ.

Çак икĕ тренерăн вĕренекенĕсем маларах республикăри тепĕр чупура та – «Çурхи тумламра» – палăрнă.  Лапсарта иртнĕ ăмăртура – классикăра Михаил Скворцов 5 километрта, Екатерина Леонтьева тата Александр Тикинев 3 километрта 1-мĕш вырăнсене йышăннă.

Тренер Мария Гусевапа Гаврил Гусев та хытă тăрăшнине палăртрĕ, вĕсем – 4-мĕш тата 6-мĕш вырăнсенче.

Иккĕмĕш кунне Миша 1-мĕш вырăна пĕр çеккунт çеç выляса янă, 2-мĕш пулнă. 10 километра Валентина Тикинева пĕрремĕш, Настя Тикинева иккĕмĕш результатпа вĕçленĕ.

Районта йĕлтĕр сезонĕ вĕçленмен-ха. Пĕтĕмлетÿллĕ стартсем çывăх вăхăтра иртмелле.