Пĕлтернĕччĕ, «Ниме - халăх бюджечĕ» программăпа кăçал мĕнпур территори пайĕнче округ çыннисем хăйсем суйланă 106 пысăк проект пурнăçланмалла. Вĕсем хастаррăн ĕçе кĕрсе пыраççĕ ĕнтĕ: тĕрлĕ вырăнта çулсем вĕт чул е асфальт сийсемпе витĕнеççĕ, пĕвесем юшкăнран тасалса тарăнланаççĕ, Астăвăм палăкĕсем çĕкленеççĕ, масар таврашĕсем хăтлăланаççĕ... Халăх хăй тăрăшнипе обществăлла вырăнсем çĕнелсе-илемленсе пынине сăнама, паллах, питĕ кăмăллă.

Аçăмçырми территори пайĕнче пурăнакансем те пĕрлехи ĕçе хăйсен тÿпине хываççĕ. «Ниме - халăх бюджечĕ» программăна вĕсем кăçал икĕ проектпа хутшăнаççĕ. Малтикас Ялтăра ялĕнче, сăмахран, ача-пăчана савăнăç кÿме шутланă. Вĕсене валли пĕрле туслăн выляма, вăхăта сывлăхлă ирттерме вырăн пултăр тесе тăрăшаççĕ ял çыннисем.

Тĕплĕнрех - хаçатра.

Ирина ЯКОВЛЕВА