Апрелĕн 1-мĕшĕнче граждансене çар службине илес тапхăр пуçланчĕ. Çурхи призыв июлĕн 15-мĕшĕччен пырать. Призыв пирки тĕплĕнрех Йĕпреç тата Вăрнар районĕсен çар комиссарĕпе Владимир Валентинович Венедиктовпа калаçатпăр.

– Вулакансене, паллах, чи малтанах Раççей Çарне тултаракансен йышĕ кăсăклантарать. Вăрнар районĕнчен миçен пулĕç-ха вĕсем;

– Ку çуркунне Вăрнар районĕнчи 400-е яхăн çыннăн призыв комиссийĕ витĕр тухмалла. Вĕсенчен 60-шĕ салтак атти тăхăнĕç. Ыттисен тĕрлĕ сăлтавпа отсрочка илме, çавăн пекех сывлăх тăрăмне кура призывран хăтăлма ирĕк пур.

Апрелĕн 2–6-мĕшĕсенче Вăрнар район тĕп больницинче призывниксен пĕр пайĕ медицина тĕрĕслевĕ витĕр тухнă. Тепĕр черет май уйăхĕн 14–17-мĕшĕсенче тĕрĕсленĕ.

– Юлашки вăхăтра призыв тапхăрне чылай çĕнĕлĕх кĕртрĕç. Ку хутĕнче уйрăмлăхсем пулĕç-и;

– Çĕнĕлĕх пур. Ку призывран тытăнса 27 çул тултарман, унччен çар службине тăма чарулăх пулнă, сывлăхне кура запаса хăварнă граждансене халĕ призывниксен учетне куçарма тата çара илме е контрактпа çар службине яма (вăтам тата аслă професси пĕлĕвĕ илнисене) пултараççĕ.

Çакăн валли малтанах гражданинăн хăйĕн ирĕкĕ, иккĕмĕшĕнчен – сывлăхĕ çирĕп пулмалла. Виççĕмĕшĕнчен, çар комиссарĕ ячĕпе медицина тĕрĕслевĕ витĕр тухма заявлени çырмалла.

– Аслă тата вăтам професси пĕлĕвĕ илнĕ çамрăксен призывпа салтака çулталăклăх е контрактпа икĕ çуллăх каяссине суйлама ирĕк пур. Контрактпа вĕсем мĕнле çарта пулассине, çар чаçне тата должноçе те хăйсен кăмăлне кура палăртма пултараççĕ.

– Çамрăксене çар-учет специальноçĕсене вĕрентесси еплерех;

–  Çар-учет специальноçĕсемпе – «С», «Д», «Е» категориллĕ водительсене, водитель-электромеханиксене, стрелок-парашютистсене хатĕрлессипе ушкăнсем йĕркелес ĕç пырать. ВДВ-на «стрелок-парашютист» специальноçĕ пуррисене çеç илеççĕ.

Çавăн пекех Йĕпреç тата Вăрнар районĕсен çар комиссариачĕ Раççей оборона министерствин çар вĕренÿ учрежденийĕсене вĕренме кĕме кандидатсене пухать. Кăçал Санкт-Петербургри А.В.Хрулев генерал ячĕллĕ Çар академине курсантсене ытларах йышăнаççĕ. Патшалăхăн пĕрлехи экзаменĕсен кăтартăвĕсем витĕм кÿмеççĕ. Аслă çар вĕренÿ заведенийĕсене вăтам пĕлÿ илнĕ, 30 çула çитмен çамрăксене илеççĕ.

– Вăрнар районĕнчен çар вĕренÿ учрежденийĕсене каяс текенсем чылаййăн-и;

– Хальхи вăхăтра Раççей оборона министерствин çар вĕренÿ заведенийĕсенче пĕлÿ илме 14 çынна суйласа илнĕ. Вăл шутран виççĕшĕ – хĕрачасем. Заявленисене май уйăхĕн 15-мĕшĕччен йышăнаççĕ, кандидатсен уйрăм ĕçĕсене май уйăхĕн 20-мĕшĕччен ярса параççĕ.

Хушма информацие Вăрнарти çар-учет пÿлĕмĕнче е 2-50-68, 2-68-21 номерсемпе, çавăн пекех Йĕпреç тата Вăрнар районĕсен çар комиссариатĕнче е 8(835-38) 2-12 -74, 2-12-72 номерсемпе ыйтса пĕлме пулать.

Çарта тăни – пысăк чыс тата хисеплĕ тивĕç, çавăнпа та призывниксем çĕршывăн хÿтĕлевçисен ретне хистемесĕр тăрассине чĕререн шанатăп.

Светлана ЧИКМЯКОВА калаçнă.