Мăн Явăш хĕрачин Екатерина Кошкинан çитĕнÿсен енчĕкне тата тепĕр сумлă награда хушăнчĕ.

Пултаруллă спортсменка Тутарстан Республикинчи Мамадыш хулинче ирĕклĕ кĕрешÿ енĕпе иртнĕ Пĕтĕм Раççейри турнирта чи çÿллĕ шайри медале – ылтăна – тивĕçнĕ. Кавир çинче вăл Чечняри, Дагестанри, Казахстанри, Мускаври, çĕршывăн ытти регионĕсенчи вăйлă кĕрешÿçĕсемпе тытăçăва кĕнĕ.

Ун командăри юлташĕн – Вăрнарти Милена Федорован та – кăтартăвĕ чаплă. Вăл та кĕрешÿре пысăк ăсталăхĕпе усă курса ылтăн медаль çĕнсе илнĕ.

Хурăнсур Çармăс хĕрĕсем те, Эльвира Филипповапа Ангелина Егорова, турниртан савăк кăмăлпа таврăннă. Вĕсен – бронза медальсем.

Пăваялĕнчи Максим Иванова кăшт ăнăçман. Вăл турнирăн пиллĕкмĕш йĕркине йышăннă. Çĕнтерÿçĕсене медальсемсĕр пуçне укçан сумлăн хавхалантарнă.