Пирĕн пултаруллă ентеш, çыравçă, Чăваш Республикин культурăн тава тивĕçлĕ деятелĕ Ольга Куликова (Улькка Эльмен) хăйĕн чаплă юбилейне паллă турĕ.

Çак ятпа вăл тусĕсене, ĕçтешĕсене, фаначĕсене Чăваш наци библиотекине творчество каçне пуçтарнă. Хăйĕн шкул ачисем валли çырнă «Кушак» кĕнекипе паллаштарнă. Издание чĕрчунсене юратма, çывăх çынсемпе хутшăнусем йĕркелеме пулăшакан калавсем кĕнĕ. Автор малашнехи плансене те уçса панă. Чăн та, Улькка Эльменĕ – чăваш литературин чăн-чăн мерченĕ. Унăн кĕнекисем аслă çулхисене çеç мар, çамрăксен чĕрисене те çавăрса илме пултарчĕç. Ахальтен мар ĕнтĕ вăл çырнă хайлавсем пĕрре мар «Литературăллă Чăваш ен% çулталăкри чи вуланакан кĕнеке» республика конкурсĕнче çĕнтерчĕç.

Творчество каçĕнче Ольга Геннадьевна ячĕпе нумай-нумай ырă сăмах янăранă. Чăваш поэт-писателĕсем Анатолий Кипеч, Юрий Сементер, Светлана Азамат, Людмила Сачкова, Василий Кервен, Галина Матвеева, Раиса Воробьева, Лидия Ковалюк, ыттисем ун пултарулăхне чи пысăк хак панă.

«Çĕнтерÿ çулĕ» хаçат редакцийĕн коллективĕ те хамăрăн ĕçтешĕмĕре, талантлă çыравçăна Ольга Геннадьевна Куликована юбилей ячĕпе саламласа ăнăçу сунать. Пултарулăх çулĕ çăлтăрлă пултăр. Вулакансене çĕнĕрен те çĕнĕ калав-повеçсемпе савăнтарса тăрăр! Телей, çирĕп сывлăх яланах юнашар çÿреччĕр!