Район администрацийĕнче республикăри агропромышленность комплексĕн ветеранĕсен Союзĕн районти уйрăмĕн черетлĕ ларăвĕ иртнĕ.

Мероприятие район администрацийĕн пуçлăхĕ Андрей Тихонов, унăн пĕрремĕш заместителĕ – ял хуçалăхĕпе экологи пайĕн пуçлăхĕ Вячеслав Горбунов хутшăннă.

Андрей Тихонов ветерансене районăн социаллă-экономика пурнăçĕпе паллаштарнă, ĕç тĕллевĕсене палăртнă.

Ветерансем обществăлла организацин кăçалхи ĕç-хĕлне пĕтĕмлетнĕ. Ларура çĕнĕ ертÿçĕ суйланă. Канаш членĕсенчен нумайăшĕ Роберт Петровшăн сасăланă. Вăл чылай çул «Санары» агрофирма тилхепине çирĕппĕн тытса пынă. «Чăваш Республикин ял хуçалăхĕн тава тивĕçлĕ ĕçченĕ» хисеплĕ ята тивĕçнĕ.

Районти АПК ветеранĕсен Канашĕн председателĕн çумĕ пулма Николай Юркина суйланă. Вăл «Самолет», «Броневик» колхозсен председателĕнче, «Чăвашсетьгаз» акционерлă обществăн «Вурнарыгаз» филиалĕн пуçлăхĕнче тата ытти ĕçре тăрăшнă.

Елена ПОРФИРЬЕВА.