Хамăр салтаксен пурнăçне сыхлас ĕçе тÿпе хывас тĕлĕшпе паян çĕршывĕпех маскировка сечĕсем çыхаççĕ. Дронсенчен те хÿтĕленине шута илсе вĕсем паян çапăçу хирĕнче питех те кирлĕ. Çакна шута илсех ĕнтĕ хамăр округра та сетка çыхакан точкăсем ÿссех пыраççĕ. Чылай ял çынни ыркăмăллăх ĕçне хастар хутшăнать.

Уравăшра пурăнакансем те Çĕнтерÿллĕ ĕçрен аякра тăмаççĕ. Ятарлă çар операцийĕ тытăннăранпах вĕсем пĕр шухăшлă пулса ентешсене пулăшу алли тăсаççĕ.

Малтанах вĕсем тулли мар мобилизаципе çĕршыв интересĕсене хÿтĕлеме тăнă çамрăксем валли япаласем туянма укçа-тенкĕ пуçтарнă. Гуманитари пулăшăвне виçĕ хутчен йĕркеленĕ.

Уравăшра пысăк ĕçсене пĕрле тума халăх яланах кар тăрать. Пĕлтĕр, ак, вĕсем пĕрле пухăнса масар картине çĕнетнĕ. Кăçал чиркĕве хута янă. Тавраллах маскировка сеткисем çыхма тытăнсан ку ĕçрен те юлас мар тенĕ.

Тĕрĕссипе, уравăшсем кăçал малтанах, март уйăхĕнче, окоп çуртисем тунă. «ZOV Вурнары» волонтер ушкăнĕ парафинпа тивĕçтернипе пĕтĕмпе 178 банка çурта хатĕрленĕ. Çак ĕçе ялти хастар арçынсем те хутшăннă.

Халĕ вара çур çул енне вĕсем маскировка сечĕсем çыхассипе ĕçлеççĕ. Станокне Олег Ехлаков ăсталаса панă. Материалĕсемпе Денис Авакумов тивĕçтернĕ. Малтанах çыхмалли хатĕрсене ял çыннисем хăйсем укçа пуçтарса туяннă. Вĕсенчен тĕслĕх илсе Григорий Васильев, Валентинăпа Анатолий Самсоновсем тата икĕ рулон спандбонд илсе панă. Наташа Гаврилова та пулăшу кÿнĕ.

«Çакăн пек пуçланса кайрĕ пирĕн ĕç. Çурхи ĕçсем тытăниччен вунă сетка çыхрăмăр. Ял çыннисем пулăшу кирлине ăнланни савăнтарать. Çавăнпах ĕнтĕ нумайăшĕ Çĕнтерÿшĕн хăйсен тÿпине хывма тăрăшать»,- пĕлтерчĕ ялти клуб ертÿçи Вероника Илларионова.

Сеткăсене ахаль кăна ăсатман. Кашнин ăшне нуски-трусы, салфеткăсем тата 90-мĕш псалом чиксе янă.

Кăштах тăхтав хыççăн хастарсем каллех пархатарлă ĕçе пуçăннă. Июльтен тытăнса хальччен тата тепĕр вунпĕр сетка хатĕрленĕ вĕсем. Кашнийĕ 3 метр çÿллĕш, 12 метр сарлакăш.

Схемăпа, кашни пайĕ тăн-тăн пултăр тесе çыхаççĕ вĕсем. Çанталăк тапхăрĕсене шута илеççĕ. Сетка сывлăшран тăшман куçне ан лектĕр тесе курăк, йывăç, çĕр тĕсĕсене кирлĕ пек туса çыхаççĕ.

Кашнин хăйĕн ĕç . Пĕр ушкăн, акă, лентăсене кирлĕ виçепе касать, тепри вĕсене «курăк» валли кирлĕ пек касать. Тата тепĕр ушкăн типтерлĕн çыхать. Хастарсен йышĕнче - Вероника Илларионова, Любовь Лукина, Елена Матвеева, Нина Васильева, Ольга Иванова, Галина Павлова, Тамара Вазянга, Клара Сюмайкина, Валентина Степанова, Ольга Васильева, Зинаида Сидюхина, Ильзита Васильева, Алена Егорова. Зоя Петрова вара Çĕн Мĕлĕш ялĕнчен ятарласа килет.

Çуллахи вăхăтра учительсем те пулăшу аллине тăснă. Ольга Косарева çемйипе, Марина Ермошкина темиçе хутчен те сетка çыхма хутшăннă.

Тĕп ĕçлевçĕсем пурте тенĕ пек тивĕçлĕ канури çынсем. Кам почтăра, кам больницăра, çĕвĕ фабрикинче , поварта, учительте, ытти çĕрте ĕçлесе пенсие тухнă. Паян вара вĕсене пĕр тĕллев - Çĕнтерĕве çывхартасси, хамăр салтаксене май пур таран пулăшасси пĕрлештерет.

СВО-ри ентешĕсемшĕн кашни кун кĕл тăваççĕ вĕсем. Паян фронтра тăваттăн. Паттăрла пуç хунă салтаксене те манмаççĕ, вĕсене те аса илеççĕ.

Çав тери çивĕччĕн ĕçлеççĕ уравăшсем. Аллисем хăнăхни тÿрех курăнать. Кашни кун тăрăшаççĕ пулин те пулăшу ĕçĕ йăлăхтарманнине палăртаççĕ вĕсем. Клуба ирхи вунă сехет тĕлне пухăнаççĕ, киле вара 15 сехет иртсен çеç таврăнаççĕ. Тепĕр чух каярах юлни те пулать. «Çыхса пĕтермесĕр каяс килмест. Кунта хавхаланса ĕçлетпĕр те киле те лайăх кăмăлпа каятпăр»,- теççĕ маттурсем.

Сетка çыхнă вăхăтра юрă сасси те илтĕнет кунта. Творчество сезонне уçма чылай юрă вĕреннĕ вĕсем. Халĕ, ак, Пĕтĕм тĕнчери ватăсен кунне кĕтсе илме хатĕрленеççĕ.

Чи кирли - вĕсен чĕрисем кашниннех Çĕнтерÿшĕн çунаççĕ. Çавăнпах кирлĕ те пĕрлĕхлĕ ĕçрен юласшăн мар.

Сăмах май, Уравăшри тата тепĕр хастар çинчен те каласа хăвармалла. Надежда Грачева салтаксем валли 140 мăшăр нуски çыхса ăсатнă.

Уравăшсенчен тĕслĕх илмеллех.

Светлана ЧИКМЯКОВА