Вăрнарти ял хуçалăх техникумĕнче районсем хушшинчи «Чи лайăх пыл» конкурс иртрĕ. Мероприятие районти ветеринари станцийĕн пуçлăхĕ Владимир Матвеев, çавăн пекех Вăрнарпа Элĕк районĕсенчи хурт-хăмăр ăстисем хутшăнчĕç.

Конкурса икĕ районти тĕрлĕ ял тăрăхĕнчи уйрăм çынсем 27 тĕрлĕ чечек пылĕсене тăратрĕç. Техникумăн пулас çамрăк специалисчĕсем пыл пахалăхне тĕрлĕ номинаципе хакларĕç.

Дегустаци кăтартăвĕсемпе пур сортсенчен те чи лайăххи Вăрнар поселокĕнчи М.Алексеевăн пылĕ пулчĕ. Иккĕмĕш вырăна Кайри Тукайри Б.Васильевпа Кивçурт Енĕшри В.Алексеев тухрĕç. Виççĕмĕш вырăна виççĕн – Вăрнарти ял хуçалăх техникумĕ, «Санар» агрофирма (Е.Мутина хурт-хăмăр ăсти), Çăлкас Кăкшăмри А.Лукин йышăнчĕç. Пылăн тавар пахалăхĕпе, тутипе Элĕкри В.Терентьева, Вăрнарти М.Емельянова, Çĕрпелти П.Черкасова çитекенни тупăнмарĕ.

К.ЮРЬЕВ.