Тепĕр хут аса илтеретпĕр: кăçалхи июлĕн 2-мĕшĕнчен «Коррупцие хирĕç пĕрле» конкурса хутшăнакансен ĕçĕсене йышăнма тытăнаççĕ. Вĕсен çак темăна видеороликра е плакатра сăнарласа социаллă реклама хатĕрлемелле.

Конкурса Раççей Тĕп прокуратури ирттерет. Йĕркелÿçĕсем çапла майпа коррупципе кĕрешес ĕçе çамрăксене те явăçтарасшăн, обществăра ку усал пулăма хирĕçле шухăшсене çирĕплетесшĕн. Социаллă реклама, ăна халăхра сарни коррупцилле преступленисене асăрхаттарма пулăшасса та шанаççĕ.

Конкурс Раççейри кăна мар, Армени, Беларусь, Казахстан, Кăркăсстан, Таджикистан республикисенчи çамрăксене те пĕрлештерет. Жюри йышĕнче ку çĕршывсен представителĕсем те пулĕç.

Малтанах чи лайăх видеороликсемпе плакатсене вырăнти комиссисем палăртĕç, иккĕмĕш тапхăрта вĕсем Мускаври финалта ăмăртаççĕ.

Конкурс çĕнтерÿçисене Коррупципе кĕрешмелли пĕтĕм тĕнчери кун (декабрĕн 9-мĕшĕ) тĕлне дипломсемпе тата хаклă парнесемпе чыслама палăртнă. Тулли информаци – Раççей Тĕп прокуратурин сайтĕнче.

И.ЯКОВЛЕВА.