Иртнĕ çулхи ноябрьте Раççей Президенчĕ В.Путин «С.А.Герасимов ячĕллĕ Пĕтĕм Раççейри патшалăхăн кинематографи институчĕ 100 çул çитнине уявласси çинчен» Указа алă пуснă. Указпа килĕшÿллĕн, республикăра 2018 – 2019 çулсем валли ятарлă План çирĕплетнĕ.

Паллă датăна халалласа Чăваш ен Культура министерствине пăхăнакан учрежденисенче, район-хуласенче тĕрлĕ мероприятисем иртеççĕ: тематика урокĕсем, çавра сĕтелсем, викторинăсем, конкурссем, ытти культура мероприятийĕсем. Çулталăк вĕçĕнче Пĕтĕм тĕнчери студентсен фестивалĕ пулĕ.

ВГИК тĕнчери пĕрремĕш Патшалăх кино шкулĕ пек 1919 çулхи сентябрĕн 1-мĕшĕнче йĕркеленнĕ. Унта режиссерсене, операторсене, актерсемпе художниксене хатĕрленĕ. Кунта Лев Куляшов теоретик тата монтаж практикĕ, çавăн пекех унăн вĕренекенĕ Всеволод Пудовкин киноактерсен шкулне уçнă.

ВГИК выпускникĕсем хушшинче – Григорий Чухрай, Марлен Хуциев, Эльдар Рязанов, Андрей Тарковский, Василий Шукшин, Андрей Кончаловский тата ытти паллă режиссерсем.