Ĕнер районта Пĕтĕм Раççейри «Единая Россия» партин районти уйрăмĕн делегачĕсен конференцийĕ иртрĕ. Унта хутшăннисем малтанах мандат тата счет комиссийĕсен председателĕсемпе секретарĕсене палăртакан докладсене йышăнса çирĕплетрĕç.

Конференци кун йĕркине виçĕ ыйту кĕртнĕ. Пĕтĕм Раççейри «Единая Россия» партин Вăрнар район уйрăмĕн секретарĕ Леонид Николаев парти пуçарнă федераллă проектсем Чăваш енре ÿсĕмлĕ пурнăçа кĕрсе пынипе паллаштарчĕ.

Вĕсем – «Хăрушсăр çулсем», «Сывă пуласлăх», «Истори астăвăмĕ», «Çирĕп çемье», «Раççей ялĕ», «Çĕнĕ шкул», «Халăх тĕрĕслевĕ» тата ыттисем – пĕтĕмпе вун тăваттă. Пурте çĕршыв çыннисен ырлăхне, пурнăçпа ĕç условийĕсене лайăхлатас тĕллевлĕ. Вĕсен тивлечĕпе районта та пысăк ĕç пурнăçланать: ФАПсем уçăлаççĕ, çулсем юсанса çĕнелеççĕ, вĕрентÿ учрежденийĕсенче юсавсем иртеççĕ, ял хуçалăхне пулăшу килет тата ытти те.

Конференцие пухăннă делегатсем çавăн пекех вăрттăн сасăлав майĕпе вырăнти политканаш тытăмне çĕнĕрен кĕрекенсене суйларĕç. «Единая Россия» партин Чăваш енри регион уйрăмĕн XXVII конференцине хутшăнма делегатсене палăртрĕç.