Электрооборудовани юсавсăрри е ăна ĕçлеттернĕ чух йĕркене пăхăнманни – пушарсен тăтăш сăлтавĕсенчен пĕри. Çакна асра тытса асăрхануллăрах пуласчĕ. Изоляцийĕ сиенленнĕ электричество пралукĕсемпе тата кабельсемпе, арканнă розеткăсемпе е рубильниксемпе вуçех усă курма юрамасть.

Электролампăсене тата светильниксене хутпа, çунакан ытти япалапа витни-чĕркени те хăрушă. Ăшă хÿтĕлевĕн хатĕрĕсем çук е ăшă регуляторĕ юсавсăр электроутюгсемпе, электроплиткăсемпе, электрочейниксемпе тата ăшăтмалли ытти хатĕрпе усă курни те инкеке çывхартма пултарать.

Пÿлĕмсене килте ăсталанă электроприборсемпе ан ăшăтăр. Кил-хуçалăхри электроприборсене электросете чиксе асăрхавсăр ан хăварăр, вăл шутра – кĕтекен режимра та.

Кил-тĕрĕшре газ оборудованийĕ пурри те уйрăм тимлĕх ыйтать. Çак правилăсене пурин те çирĕп пăхăнмалла:

– газ баллонĕсене уйрăм çуртсенче, хваттерсемпе пурăнмалли пÿлĕмсенче, тĕпелсенче, эвакуаци çулĕсенче, пусма тăваткалĕсенче, путвалсемпе чартаксенче, балконсем çинче упрама юрамасть;

– газ тухни палăрать-тĕк, нимле газ оборудованине те ĕçлеттермелле мар;

– газ арматурин пайĕсене хĕлхем кăларакан инструментсемпе çыхăнтармалла мар, пĕрлештернĕ вырăнсене уçă çулăмпа (чĕртнĕ шăрпăкпа, зажигалкăпа, çуртапа) тĕрĕслени хăрушă;

– юсавсăр газ приборĕсемпе усă курма юрамасть, вĕсен çывăхне сĕтел-пукан е çунакан ытти япала ан вырнаçтарăр.

Аса илтеретпĕр: пушар тухнине, пÿлĕмре тĕтĕм сарăлнине сисрĕр-тĕк, тÿрех пулăшу чĕнмелле. Пушар хуралне кĕсье телефонĕнчен шăнкăравламалли пĕрлĕхлĕ номер – 101.

Асăрхав тата профилактика ĕçĕ-хĕлĕн Вăрнар районĕнчи уйрăмĕ.