Ытларикун Вăрнарта ку çулхи чи паллă та чаплă культура событийĕ пулчĕ – Максим Дормидонтович Михайлов ячĕллĕ Пĕтĕм тĕнчери XXVIII опера фестивалĕ йĕркипе гала-концерт иртрĕ. Ăна пирĕн мухтавлă ентеш, çĕршыври паллă бас çуралнăранпа 125 çул çитнине халалларĕç.

Район администрацийĕн культура пайĕн пуçлăхĕ Ирина Алексеева гала-концерта М.Д.Михайловăн тăван çĕрĕ çинче ирттернин пысăк пĕлтерĕшне, унăн опера искусствине аталантарас ĕçе хывнă тÿпине ырласа палăртрĕ.

Программа «Севильский цирюльник» оперăри Розина каватинине юрланипе уçăлчĕ. Ăна Чăваш Республикин тава тивĕçлĕ артистки Маргарита Финогентова шăрантарчĕ. Мăнаçлă та хăватлă саспа çак каç «Нарспи», «Риголетто», «Фауст», «Сказки Гофмана», «Травиата» оперăсенчи арисем янăрарĕç. Вăрнар сцени çине Чăваш патшалăх оперăпа балет театрĕн паллă, талантлă солисчĕсем тухрĕç, симфони оркестрĕ тыткăçуллă вылярĕ. Дирижерĕ – Раççей тава тивĕçлĕ артистки, Чăваш Республикин искусствăсен тава тивĕçлĕ деятелĕ Ольга Нестерова.

Вăрнарсем, паллах, юрăçсен йышĕнче хамăр ентешсем пулнипе те мăнаçланчĕç. Сумлă ятсене тивĕçнĕ Çĕрпел хĕрĕ Мария Еланова «Сила судьбы» оперăри Леонора арине, Кÿлхĕрри хĕрĕ Валентина Смирнова-Геворкян «Укăлча умĕнче» юрра вăйлă саспа янраттарчĕç.

Опера театрĕн коллективĕ вăрнарсем умне хамăр тата ют çĕршывсен, чăвашсен паллă композиторĕсен 16 произведенине кăларчĕ. Кашни солиста нумайччен тăвăллăн алă çупса йышăнчĕç. Куракансен кашнин сăнĕнче савăнăçпа тĕлĕнÿ çырăнчĕ.

Вăрнар район çыннисем гала-концертпа Китай Халăх Республикинчен килнĕ хăнана та – пĕтĕм тĕнчери конкурссен лауреатне Лю Иньлуна ăшшăн саламларĕç, вăл вырăсла тасан юрланипе киленчĕç.

Чăннипех те пысăк уяв, чунри савăнăçа парнелерĕç опера юрăçисем. Видеофильмра Кульцавран тухнă Максим Дормидонтович Михайловăн кун-çулне сăнларĕç. Нумаях пулмасть пурнăçран уйрăлнă унăн мăнукне – чăваш халăх артистне Максим Игоревич Михайлова аса илчĕç.

Район администрацийĕн пуçлăхĕ Леонид Николаев чаплă кĕвĕ каçне парнеленĕшĕн артистсене пĕтĕм халăх ячĕпе тав турĕ.

Светлана ЧИКМЯКОВА.