Раççей Конституцине йышăннăранпа 25 çул çитнине халалласа ВЦИОМ тата Раççей çĕнĕ историйĕн патшалăх тĕп музейĕ тĕпчев ирттернĕ, халăх Конституцие мĕнле пĕлнине тĕрĕсленĕ. Респондентсемпе телефон урлă калаçнă, унта 18 çултан аслăрах 1,6 пин çын хутшăннă.

Ыйтăма хутшăнакансенчен 69 проценчĕ Конституци пирки пĕтĕмĕшле, 6 проценчĕ лайăх пĕлнине кăтартса панă. 23 проценчĕ вара ку документ статйисем пирки нимĕн те пĕлмест.

Граждансем Конституцире палăртнă тĕп правасем тата ирĕклĕх шутне «Право на охрану здоровья» (49%), «Право на образование» (45%), «Право на труд» (40%), «Право на социальное обеспечение» (38%) статьясене кĕртнĕ. Раççей çыннисем чи малтанах социаллă тивĕçтерÿсемпе (54%), сывлăх сыхлавĕпе (46%), ĕç прависене хÿтĕлессипе (41%) çыхăннă саккунсемпе кăсăкланнине пĕлтернĕ.

Респондентсем Раççей Конституцине аслă шкулта (38%) тата шкулта (30%) вĕреннĕ вăхăтра тишкернине пĕлтернĕ. Унсăр пуçне, кашни тăваттăмĕш çын (23%) документри тĕп положенисене хăй пуçарăвĕпе вĕреннĕ.

Ыйтăм çавăн пекех Раççей çыннисен 66 проценчĕ Раççей Конституцине хăçан йышăннине пĕлменнине кăтартнă. Тĕп-тĕрĕс хурава 13 проценчĕ кăна панă.