Çĕнĕ çул – ачасемшĕн те, аслисемшĕн те чи юратнă уяв. Ăна кĕтсе илме кашниех килте чăрăш вырнаçтарса илемлетет. Анчах хаваслă уяв инкекпе кăмăла ан пăстăр тесен пурин те асăрхануллă пулмалла.

Çĕнĕ çул чăрăшне çирĕп тĕрев çине, ăшă приборĕсенчен аякра вырнаçтармалла, заводра туса кăларнă, юсавлă гирляндăсемпе çутатмалла.

Чăрăша çуртасемпе, мамăкпа, хутран тунă теттесемпе илемлетме, ун çывăхĕнче бенгаль çуртисене çутма тата ытти пиротехника изделийĕсемпе усă курма юрамасть. Уява марльăран, мамăкран, хутран ăсталанă маскарад тумтирне ан тăхăнăр.

Учрежденисенче чăрăша иккĕмĕш хутран çÿллĕ мар вырнаçнă пÿлĕмре лартмалла, унтан эвакуаци çулĕ иккĕрен кая мар пулмалла. Уяв иртекен пÿлĕме пушар сÿнтермелли пĕрремĕшле хатĕрсемпе тивĕçтермелле.

Шкулсенче е çын нумай пухăнакан ытти учрежденисенче Çĕнĕ çула уявланă чух ачасене хăвăрт тивсе илекен материалсенчен çĕленĕ-ăсталанă тумтир тăхăнтартма, пушар тĕлĕшĕнчен хăрушă ĕçсене ирттерме, пÿлĕмре лармалли вырăнсем хушма тата представленисем вăхăтĕнче çутта пĕтĕмпех сÿнтерме юрамасть.

Çĕнĕ çул уявне илемлетме усă куракан пиротехника изделийĕсем савăнăç кÿнипе пĕрлех пысăк хăрушлăх та кăларма пултараççĕ. Çавăнпа та пахалăхсăр, ăçта туса кăларни паллă мар продукцие туянассинчен асăрханăр.

Пиротехника изделийĕсен сертификат, вĕсемпе усă курмалли инструкци, предприяти адресĕ е телефонĕ пулмалла. Фейерверксене йĕпе е ытлашши типĕ пÿлĕмре, хăвăрт хыпса илекен япаласем, ăшă приборĕсем çывăхĕнче упрама юрамасть. Пиротехника изделийĕсене кĕсьере, автомашинăра илсе ан çÿрĕр, ачасем çитеймен çĕре хурăр.

Уявра фейерверк ярас умĕн ăна ăçта вырнаçтармаллине палăртса хурăр. Çÿлте йывăçсем, электричество пралукĕсем пулмалла мар. Тепĕр чару – вăйлă çил вĕрнĕ вăхăтра пиротехника изделийĕсемпе усă курма юрамасть. Япăх çанталăкра фейерверк яни инкекпе вĕçленме пултарать. Тĕслĕхрен, йĕпеннĕ ракетăсем çÿлелле вĕçмеççĕ, куракансем çывăхĕнче сирпĕнеççĕ.

Фейерверк ярассишĕн пĕр çын яваплă пулмалла, ÿсĕрле пиротехника çывăхне ан пырăр. Пиротехника изделийĕсене чĕртнĕ чух алăра тытма, ун патне пĕшкĕнме, сÿннĕ хыççăн 10 минут иртмесĕр çывăха пыма юрамасть.

Ракетăсене тата вĕçекен фейерверк изделийĕсене çурт-йĕртен, хуралтăсенчен, уçă чартаклă çуртсенчен аякра ямалла.

Пиротехника изделийĕсемпе 18 çула çитмен çамрăксен усă курма, вĕсем çывăхĕнче чĕлĕм туртма, изделисене çĕре ÿкерме е çулăма пăрахма, çулăм хăйăвĕ сÿнсен тепĕр хут чĕртме, фейерверка пÿлĕмре яма юрамасть.

А.ПЕТРОВ,

асăрхав тата профилактика ĕç-хĕлĕн районти уйрăмĕн пуçлăхĕ.