Карл Маркс ячĕллĕ кооперативра экологи тĕлĕшĕнчен таса продукци туса илесси тĕп вырăнта. Иртнĕ çул акă Çавалкасри фермăра сĕт сивĕтмелли тепĕр оборудовани вырнаçтарнă. Чĕртавара 4 градус ăшăра тытаççĕ.

Хуçалăхра мăйракаллă шултра выльăх-чĕрлĕх 920 пуç, çав шутра – 300 пуç ĕне.

Хуçалăх кассине тупăш кÿрекенни – сĕт. Нарăс уйăхĕн 1-мĕшĕнче хушка пуçсенчен 2941 килограмм сĕт суса илнĕ. Чĕртавара 22 тенкĕпе вырнаçтараççĕ.

Çавалкасри, Сăкăтри фермăсенче 36 çын тăрăшать.

– Выльăх-чĕрлĕх алла пăхать. Рацион тулăх пултăр тесе тăрăшатпăр, – терĕ Захар Углов. Вăл кооперативра техник-осеменатор, зоотехник-селекционер ĕçĕсене пурнăçлать. Захар Валентинович нумай çул тÿрĕ кăмăлпа тăрăшать, коллективра – ырă ятра.

Карл Маркс ячĕллĕ кооперативра тăрăшакансем валли лайăх ĕç условийĕсем туса панă. Акă, сăмахран, техник-осеменатор кабинетне йăлтах çĕнетсе улăштарнă. Ĕç çыннисен кану пÿлĕмĕнче те хăтлă, ăшă.

– Пĕлтĕрхинчен те лайăхрах ĕçлесчĕ, тата пысăкрах çитĕнÿсем тăвасчĕ, – çирĕплетрĕ Захар Валентинович.

Елена ПОРФИРЬЕВА.