Сысна ĕрчетес ĕçре «Луч» кооператив курăмлă тăрăшать. Иртнĕ çул хуçалăх 112,6 тонна е малтанхи çулхинчен 5,4 процент ытларах аш-пăш туса илнĕ тата вырнаçтарнă.

«Луч» кооператив аталану çулĕпе пырать. Юлашки çулсенче пĕр пин пуç сысна вырнаçмалăх тата тепĕр вите-хуралтă хута янă. Вячеслав Ижелеев ертÿçĕ пĕлтернĕ тăрăх, чух-чухсен хисепне 2,1 пин пуç таран ÿстерме майсем çителĕклĕ. Плансем пысăк. Малашлăхра кооперативра 250 тонна аш-пăш туса илме, сыснасене искусствăлла майпа пĕтĕлентерме, выльăх пусмалли цеха хута яма палăртаççĕ.

Чух-чухсене ирĕке кăлармаççĕ. Ферма «хупă» режима пăхăнать. Автотранспорта кĕрсе тухма санпропускник уçнă. Ăна ăшăтса тăраççĕ.

Хальхи вăхăтра кооперативра 1150 пуç сысна. Нарăс уйăхĕн 1-мĕшĕ тĕлне усă куракан 100 гектар çĕр пуçне 8,4 центнер аш туса илнĕ. Ку кăтарту пĕлтĕрхинчен 33,3 процент пысăкрах.

Елена ПОРФИРЬЕВА.