Ĕçлекен çамрăксен «Хĕллехи десант» республикăри IV спорт фестивалĕ иртнĕ. «Сурские зори» турист базине Чăваш енри вунпĕр район-хула команди пухăннă.

Фестивале Раççей Патшалăх Думин депутачĕ Николай Малов, Етĕрне район администрацийĕн пуçлăхĕ Андрей Софронов, «Август» Фирмăн «Вăрнарти хутăш препаратсен завочĕ» филиалĕн директорĕ Владимир Свешников саламланă.

Командăсем хăйсемпе сăвăлла-юрăлла формăпа паллаштарнă. Ытти конкурссем уçă площадкăсенче иртнĕ: хаваслă стартсем, пневматикăллă винтовкăран пересси, йĕлтĕрпе ăмăртасси, ăс-хакăл конкурсĕ тата ытти те.

Фестиваль çĕнтерÿçи – Тăвай районĕн çамрăксен правительстви. 2-мĕш вырăнта – Т Плюс ушкăнра ĕçлекен Мари Элти тата Чăваш енри филиалĕн çамрăксен канашĕ. Вăрнарти хутăш препаратсен завочĕн çамрăк ĕçченĕсен канашĕ 3-мĕш вырăн йышăннă.

Çакнашкал мероприятисем çамрăксене сывă пурнăç йĕркипе туслашма пулăшаççĕ çеç мар, пĕтĕçтереççĕ те.

Фестиваль Чăваш ен Вĕрентÿпе çамрăксен политикин министерствин тата Чăваш енри çамрăксен инициативисен центрĕн пуçарăвĕпе иртет. Тĕп спонсорĕ – «Август» компани, тĕп йĕркелÿçи унăн «Вăрнарти хутăш препаратсен завочĕ» филиалĕ.

Людмила ИВАНОВА.