Шĕнер Ишек ялĕнче сывă пурнăç йĕркине тытса пыракансен ушкăнĕ пур уява та пĕрле ирттерме тăрăшать: Çĕнĕ çул, февралĕн 23-мĕшĕ, Мартăн 8-мĕшĕ, Çăварни, йĕлтĕр сезонне хупни.

Вăрманти уçланкă – чăн-чăн хĕллехи кану вырăнĕ. Кунта тахçан çамрăксем чуччу ярăнма пуçтарăннă.

Клуб çук тесе хуйхăрса лармаççĕ шĕнер-ишексем, кăмăл тата пĕр шухăшлă пулни анчах кирлĕ.

Хальхинче те арçынсене саламлама «Чуччу» уçланкине хастарсем вăхăтра пуçтарăннă. Пурте уяв тĕлне ятарласа çĕлеттернĕ формăсемпе. Çĕлекенĕ – Зоя Сергеевна Иванова. Уçланкăра чăваш юрри янăранă. Çанталăкĕ те уява пухăннисемпе пĕр шухăшлă тейĕн – хĕвеллĕ, ăшă.

Хĕрарăмсем маттур арçынсене уяв ячĕпе саламланă, парнесемпе чысланă. Çав вăхăтра кăвайт çинче курăк чейĕ вĕренĕ, хуранта салтак пăтти пиçнĕ. «Сĕтелĕ те пуян, анчах салтак пăттинчен тутли пулмарĕ», – тенĕ уява пуçтарăннисем пĕр шухăшлăн.

Малалла спорт ăмăртăвĕсем пуçланнă: винтовкăран тĕл пересси, юр çинчи футбол. Уяв пурин кăмăлне те кайнă, вăхăт иртни те сисĕнмен.

Çакăн пек уявсене йĕркелесе пыракан та кирлĕ. Ку ялти пуçаруçă – Анатолий Иванович Васильев. Л.Убакова, В.Ефимова, Л.Антонова, З.Васильева, Л.Григорьева, А.Краснова çак пултаруллă, сывă пурнăç йĕркин ушкăнне пĕтĕçтерсе пыраççĕ. Унта тĕрлĕ ÿсĕмри çынсем пĕрлешнĕ: тивĕçлĕ канăва тухнисем те, тĕрлĕ вырăнта ĕçлекенсем те, шкул ачисем те.