Чăваш ен Правительствин ларăвĕнче республикăри нумай ачаллă çемьесен регистрне тумалли тата нумай ачаллă çемьесене удостоверенисем памалли йĕркесене çирĕплетесси çинчен постановлени проектне сÿтсе явнă.

Асăннă удостоверение 18 çул тултарман виçĕ е унран та ытларах ачана (усрава илнисене те шута кĕртеççĕ) воспитани парса ÿстерекен ашшĕ-амăшĕнчен пĕрне (е ашшĕне, е амăшне)параççĕ. Ку документа йышлă çемье членĕсем пурте Раççей гражданĕсем пулсан тата çемье ялан Чăваш ен территорийĕнче пурăнсан тивĕçеççĕ. Удостоверени илнĕ çемьесене республикăри нумай ачаллă çемьесен регистрне кĕртеççĕ.

Удостоверение илме нумай ачаллă çемьесен вырăнти социаллă хÿтлĕх пайне пымалла. Ку документа нумай ачаллисене кăçалхи пуш уйăхĕн 25-мĕшĕнчен пама тытăнаççĕ.