Чи илемлĕ çурхи уявра хÿхĕм чечексем мĕнле пикене савăнтармĕç; Форма тăхăннă маттурсем кĕтмен çĕртен саламлаççĕ-тĕк, ак, пушшех те. Сăмахран, çул-йĕр хăрушсăрлăхĕн инспекторĕсем.

Мартăн 8-мĕшĕнче вĕсем республикăри мĕнпур хулара, районта ир-ирех çулсем çине тухнă. Автоинспекторсен уйрăм тимлĕхĕнче руль умĕнчи пикесем пулнă. Ахальтен мар – республикăра «Автоледи валли – чечексем» илемлĕх акцийĕ иртнĕ.

Унчченхи çулсенче çирĕпленнĕ ырă йăлана районти ГИБДД сотрудникĕсем те малалла тăснă, акцие хастар хутшăннă. Хăйсене чарсан автоледисем яланхиллех документ-мĕн тĕрĕслессе кĕтнĕ пулинех. Анчах инспекторсем уяв кунĕнче пачах урăхла – савăнăçлă та кăмăллă – миссие хăйсем çине илнĕ. Сотрудниксем ГИБДД уйрăмĕн пуçлăхĕпе В.Петровпа пĕрле этемлĕхĕн черченкĕ çуррине чечек çыххисемпе савăнтарнă. Машинăпа çÿрекен чиперккесене саламланипе пĕрлех вĕсем яланах хăрушсăр çул суннă. Çул-йĕр правилисене пăхăнмаллине те тепĕр хут аса илтернĕ.

Паллах, уяв автоинспекторсемшĕн хăйсемшĕн те чăн парне. Ăшă тав сăмахĕсем, хĕрсен пичĕсем çинчи чипер кулă – çăмăл мар службăра тимлекенсенне хăйсене те чылайлăха кăмăла çĕкленĕ.

Ирина ЯКОВЛЕВА.