Канмалли кунсенче мунча çунманни сайра: çак пăшăрханул-лă кăтартăва республикăри МЧС хыпарĕсем те пĕрмаях çирĕплетеççĕ.

Иртнĕ шăматкунпа вырсарникун та лару-тăру улшăнман – тĕрлĕ районта кунашкал инкексем темиçе те çырăннă. Вĕсенчен пĕри – Вăрнар поселокĕнче.

«Мартăн 17-мĕшĕнче 1 сехет те 30 минутра К.Маркс урамĕнчи хуçалăхра мунча тивсе илнĕ. Çулăм шалти отделкăна сиенленĕ. Малтанхи тĕрĕслевсем тăрăх, пушар сăлтавĕ тĕтĕм çулĕсем хăрушсăрлăха тивĕçтерменни е юсавсăрлăхĕ пулма пултарать», – пĕлтерет Раççей МЧС-ĕн республикăри тĕп управленийĕ.

Сăмах май, мартăн 22-мĕшĕ тĕлне республикăра 234 пушара шута илнĕ. Вĕсем 16 миллион тенкĕ енне тăкак кÿнĕ. Инкексенче 18 çын вилнĕ, 13-ĕн суранланнă.

Ирина ПЕТРОВА.