Хăрушă, хуйхăллă инкек... Тăруках пĕр килтен икĕ çыннăн пур-нăçне сарăмсăр илсе кайнă вăл. Çакнашкал пысăк синкер Тимĕрçкассинче çулăма пула тухнă. Республикăри следстви органĕсем ун тĕлĕшпе следстви умĕнхи тĕрĕслев ирт-тернине пĕлтереççĕ.

«Ытларикун каç еннелле пĕр хуçалăхра йывăç çурт тĕтĕмленме пуçланă. Ырă мара сиссе-асăрхаса ял çыннисем пулăшу службисене васкавлă чĕннĕ. Çулăма путлантарнă-ха, анчах çакăн хыççăн çăлавçăсен хăрушă ÿкерчĕке курма тивнĕ. Çуртра 73-ри кил хуçипе 75 çулхи мăшăрĕн виллисем пулнă.

Малтанхи даннăйсем тăрăх, вĕсем сĕрĕм газĕпе наркăмăшланнă. Следстви пушар тухнин тĕрлĕ версийĕсене тĕрĕслет. Çав шутра – чĕлĕм туртнă чух çулăмпа асăрханусăр пулнине те. Инкеке лекнисен вилĕмĕ криминаллă сăлтавпа çыхăннине кăтартакан даннăйсем çук. Пушарпа техника, медицина, ытти экспертизăсем ирттерме палăртнă. Вĕсен кăтартăвĕсем тăрăх процессуаллă йышăну пулĕ», – пĕлтерет Çĕмĕрлери районсем хушшинчи следстви пайĕ.