Çĕрпелти сортсем сăнакан участокра кашни çулах тĕрлĕ тĕслĕ ял хуçалăх культурисем çитĕнтереççĕ. Кăçалхи планпа килĕшÿллĕн урпан 10, çурхи туллăн 20, пăрçан 15, сĕллĕн 8 сортне акма палăртаççĕ. Çĕрулмине ытларах çитĕнтерĕç. Уй-хирте 33 сорт валли лаптăк уйăрĕç.

Ячĕсем илĕртÿллĕ, янăравлă. Пĕлтĕр, акă, çĕрулмин «Беллароза», «Джоли», «Аван», «Аустин», «Санибель», «Отолия», «Доната» тата ытти сорчĕсем çитĕннĕ. «Янгорчино» кооперативра иртнĕ агрономсемпе инженерсен районти семинар-канашлăвĕнче сортсен участокĕн ĕçченĕсем «иккĕмĕш çăкăрăн» куравне те йĕркеленĕччĕ.

Çĕрпелти сортсен участокĕнче виççĕн – Владимир Никифоров, Владимир Степанов, Светлана Алексеева – тимлеççĕ. Светлана Георгиевна учрежденире 1992 çултанпа тăрăшать.

– Эпир ял хуçалăх культурисем пирĕн тăрăхра мĕнле çитĕннине сăнатпăр-тĕпчетпĕр. Кайран хамăр ĕç çинчен Чăваш енри «Патшалăх сорчĕсен комиссийĕ» организацине пĕлтеретпĕр, – терĕ вăл.

Сортсен участокĕн 139,6 гектар çĕр шутланса тăрать. Калăпăшлă ĕçсене пурнăçлама вырăнти «Янгорчино» кооператив пулăшать, опычĕсене вара хăйсен техникипех усă курса тăваççĕ.

Елена ПОРФИРЬЕВА.