Иртнĕ эрнере Раççей МЧС-ĕ пĕтĕм çĕршывĕпе командăпа штаб вĕренĕвĕсене калăпăшлă йĕркеленĕ.

Виçĕ кун çăлавçăсем çурхи ейÿпе тата вăрман пушарĕсемпе çыхăннă çутçанталăк инкекĕсене пĕтерессипе хатĕрлĕхе тĕрĕсленĕ. Чăваш енре те республика, район-хула, муниципаллă шайри «вăйсене» пухнă вĕренÿсене. Тĕллевĕ ертсе пыракансен, территори тытăмĕнчи звеносен инкек пулăмĕсене сирессипе пĕлĕвĕпе хăнăхăвĕсене ÿстересси тата çăлав ĕçĕ-хĕлĕн мелĕсене анлăлатасси пулнă.

Вĕренÿсем виçĕ тапхăрпа иртнĕ. Районта, акă, пĕрремĕш тапхăрта инкексем тухнине халăха ятарлă системăпа мĕнле пĕлтерессине тĕрĕсленĕ. Кунсăр пуçне яваплă службăсене хатĕрлĕхе кĕртнĕ.

Иккĕмĕшĕ çурхи ейĕве сиенсĕр ирттерсе ярассипе çыхăннă. Çăлавçăсем умне лартнă задача çакăн пек пулнă – Мăн Çавал хăпарнипе çуртсене шыв илнĕ условнăй «инкеке» сирмелле.

Вăрманти условнăй «пушара» сÿнтермелли тата çывăхра пурăнакансене эвакуацилемелли хăнăхусен тĕрĕслевĕ виççĕмĕш тапхăрта иртнĕ.

Ирина ЯКОВЛЕВА.