Май уйăхĕн 1-мĕшĕнчен Чăваш енре пушара хирĕçле уйрăм йĕрке çирĕплетнĕ.

Вăл граждансем валли хăшпĕр чарусем кĕртет. Уйрăммăн илсен, вăрмансенче тата вĕсем çывăхĕнчи территорисенче кăвайт чĕртес, кăвар çинче апат-çимĕç хатĕрлес е çÿп-çап çунтарас тĕлĕшпе. Çавăн пекех вăрман çумĕнчи е ял хуçалăх çĕрĕсемпе юнашар çĕр пайĕсенче типĕ курăка та чĕртсе яма юрамасть. Пушар хăрушсăрлăхĕ IV тата V класс шайне ÿссен, çанталăк мĕнлине кура, вăрмансене кĕме вуçех чарассине те палăртнă.

Раççей МЧС-ĕ аса илтерет: типĕ курăкпа хытхурана çунтармалли, уçă çулăмпа усă курмалли, кăвайт чĕртмелли йĕркене пăснăшăн асăрхаттараççĕ е административлă штраф хураççĕ. Штраф виçи тĕрлĕрен: граждансемшĕн – 2–3 пин тенкĕ, должноçри çынсемшĕн – 6–15 пин тенкĕ, предприяти-организацисемшĕн – 150–200 пин тенкĕ. Пушара хирĕçле уйрăм тапхăрта штраф санкцийĕсем икĕ хут ÿсеççĕ.

Ирина ЯКОВЛЕВА.