Чăваш Республикин Министрсен Кабинечĕ Пĕтĕм Раççейри «Муниципаллă чи лайăх практика» конкурсăн регионти тапхăрне пĕтĕмлет-нĕ. Заявкăсене конкурс комиссийĕ ларура презентациленĕ.

Çĕнтерÿçĕсене тĕрлĕ номинацире палăртнă. Вĕсен йышне вăрнарсем те кĕнĕ.

«Хула строительствин политики, халăха пурăнма хăтлă хутлăх туса хурасси тата пурăнмалли çурт-йĕрпе коммуналлă хуçалăха аталантарасси» номинацире халăх шутне кура 1-мĕш категорире Вăрнар хула поселенийĕ 1-мĕш вырăн йышăннă. Ку номинацирех 2-мĕш категорире Калинино ял тăрăхне 3-мĕш вырăн панă.

Конкурсра çĕнтернин усси пысăк. Пĕрремĕш вырăна тухнă муниципаллă пĕрлĕхсене республика бюджетĕнчен хавхалантараççĕ. Кăçала çакăн валли пĕтĕмпе 1,2 миллион тенкĕ уйăрнă. Çĕнтерÿçĕсене 300-шер пин тенкĕ тивĕçет.

Пĕтĕм Раççейри «Муниципаллă чи лайăх практика» конкурс 2017 çултанпа иртет. Вăл вырăнти хăйтытăмлăх органĕсен ĕçĕн чи ырă тĕслĕхĕсене сарас тĕллевлĕ.

Светлана ЧИКМЯКОВА.