Тыр-пул хĕвелĕн сар сăнне кунран кун ытларах илсе пырать. Кĕрхисем пиçсе çитрĕç ĕнтĕ. Вырмана тухма вăхăт. Яваплă тапхăр чи малтан «Санары» агрофирмăра тытăнчĕ.

Хапăс çывăхĕнчи сап-сарă тритикале пусси куçа илĕртет. 40 гектар сарăлса выртать. Лаптăкĕ тÿрĕ вырăнта мар, анчах та тритикале шултра, парка пучахлă çитĕннĕ. Вырмана пуçăнас умĕн кĕçнерникун агрофирма ĕçченĕсем ирхине тырă ани патне çитрĕç. Çулталăкри чи йывăр та пархатарлă ĕç ăнăçлă ирттĕр, кĕрхи пÿлмесем тулли пулччăр тесе мăн асаттесен йăлипе ана пуçне çăкăр-тăвар хучĕç.

Агрофирма ертÿçи Андрей Петров хуçалăхра пĕрчĕллĕ культурăсем ăнса çитĕннине палăртрĕ.

– Тритикале – тулăпа ыраш хутăшĕ. Сорчĕ «Динамо» ятлă. Гектарти тухăçĕ 30 центнертан кая пулмалла мар, – терĕ Андрей Робертович.

Владислав Гаврилов водитель те тыр-пула ытараймасть.

– Манăн кăмăл çĕкленÿллĕ. Сарă ылтăна хăвăртрах пухса кĕртме ĕмĕтленетĕп, – терĕ вăл.

Район администрацийĕн пуçлăхĕ Леонид Николаев, «Санары» хуçалăхăн малтанхи ертÿçи – ЧР ял хуçалăхăн тава тивĕçлĕ ĕçченĕ Роберт Петров, Санарпуç ял тăрăхĕн пуçлăхĕ Виталий Белов ĕç çыннисене вырма ĕçĕсене пысăк пахалăхпа пурнăçлама çирĕп сывлăх сунчĕç, асăрхануллă тата тимлĕ пулмаллине те каларĕç.

– Уй-хире мĕнле сывă тухатăр, тăван киле те çапла тĕрĕс-тĕкел таврăнмалла пултăрччĕ, – терĕç вĕсем ырă сунса.

Агрофирмăн тырă пухса кĕртме хутшăнакан ял хуçалăх машинисем юсавлă. Кун пирки патшалăх техника асăрхавĕн районти патшалăхăн аслă инспекторĕ Иван Тимофеев пĕлтерчĕ. Ĕç техникин, пушар хăрушсăрлăхĕн правилисене пăхăнмаллине асăрхав тата профилактика ĕçĕ-хĕлĕн районти уйрăмĕн дознавателĕ Юрий Иванов асилтерчĕ.

«Санары» хуçалăхăн тĕштырăсемпе пăрçа йышши культурăсене 993 гектартан пухса кĕртмелле.   Тăрăшуллă та хастар çын вырмана чи малтан тухсан ĕç ăнать теççĕ. Агрофирмăра та çакна тĕпе хураççĕ. Тритикале вырма чи хисеплĕ механизатора, Олег Яковлева, шанчĕç.   Вăл хăй тĕллĕн çÿрекен косилкăн рульне çирĕппĕн тытса хăвăртах пĕрремĕш каçалăк турĕ. Сарлака та хулăм паккус выртса юлчĕ. Хĕвел питтинче лайăхрах пиçтĕр тесе тыр-пула çулаççĕ, тепĕр кунтан çапса тĕшĕлеме тухаççĕ.

Елена ПОРФИРЬЕВА.