Федерацин Атăлçи округĕн «Театрлă Атăлçи» фестиваль проектне Театр çулталăкне халалланă. Ăна çамрăксен пултарулăхне аталантарас тата вĕсене театр искусствипе туслаштарас тĕллевпе пуçарнă.

Ку проекта Чăваш ен те хастар хутшăнать. Нумаях пулмасть фестивалĕн республикăри тапхăрне пĕтĕмлетнĕ, çĕнтерÿçĕсене палăртнă. «Студентсен театр коллективĕсем» номинацире И.Н.Ульянов ячĕллĕ Чăваш патшалăх университетĕнче вĕренекенсен «Абрикослă сад» театрĕ (ертÿçи – Антон Савельев) малти вырăна тухнă. Фестивальте вĕсем «Ман асатте чие çырли пулнă» спектакль кăтартнă. Итали драматургĕн пьесине Дмитрий Миронов режиссер лартнă.

«Шкулти театр коллективĕсемпе ачасен театр студийĕсем» номинацире Шупашкарти 4-мĕш лицейĕн сцена искусствин студийĕ çĕнтернĕ. Çамрăк артистсем «Пурнăç ÿкерчĕкĕсем» спектакльпе (режиссерĕ – Руслан Медведев) паллаштарнă. Çĕнтерÿçĕсем хăйсен ĕçĕсемпе фестивалĕн кĕркунне иртекен округри тапхăрĕнче республика чысне хÿтĕлĕç.