Ял кинофестивалĕ Чăваш енре пиллĕкмĕш хут иртет. Кăçал вăл Вăрнара та çитет.

Кăçалхи кино мероприятине СССР летчик-космонавчĕ, Совет Союзĕн икĕ хутчен Геройĕ Андриян Николаев çуралнăранпа 90 çул çитнине халалланă. Вăрнарта вăл октябрĕн 22-мĕшĕнче районти культура çуртĕнче вырнаçнă «Звездный» кинозалта пулать. Программăна «Чăвашкино» студи тата электронлă документаци архивĕн ĕçченĕсем хатĕрленĕ кĕске метражлă икĕ кино – А.Г.Николаев тата район пирки – кĕртнĕ. Унсăр пуçне пысăк экранпа «Солдатик» тата «Большое путешествие» фильмсене кăтартĕç. Паллах, пĕтĕм курав тÿлевсĕр. 13 сехет те 30 минутра пуçланать.

Çак кун çавăн пекех тĕплĕ юсав хыççăн районти культура çурчĕн алăкĕсем çĕнĕ варкăшпа уçăлĕç. Ку пулăмпа тата кинофестиваль йĕркипе районти культура ĕçченĕсем концерт та кăтартĕç.

Ял кинофестивалĕ çавăн пекех Элĕк, Канаш, Муркаш тата Етĕрне районĕсенче иртет. Ăна Чăваш Республикин электронлă тата кинодокументаци патшалăх архивĕ пуçарнипе, «Лукойл» компанин ыркăмăллăх фончĕ пулăшнипе йĕркеленĕ.

Светлана ЧИКМЯКОВА.