Районта кашни поселенин уйрăм геральдика паллисем пулмалла тесе палăртнă. Вĕсем ку тăрăхăн чи паха енĕсене, хăйнеевĕрлĕхне туллин çутатмалла. Çавăнпа та вĕсене кунта пурăнакансен шухăшĕ-сĕнĕвĕсене шута илсе хатĕрлеме ятарлă специалистсене хутшăнтараççĕ.

Вăрманкас ял поселенийĕн сайтĕнче, акă, хăйсен гербĕн тĕслĕхĕпе паллаштарнă. Унăн тĕп пайĕ – чăрăш евĕр (ельчатай) хĕрес – ялсем вăрман каснă вырăнсенче «çуралнине» сăнлать. Район гербĕн мотивĕсемпе усă курни икĕ пĕрлĕх авалтанах уйрăлми çыхăнура пулнине пĕлтерет.

Хĕрес çийĕн ылтăн пыл хурчĕсем пĕр-пĕринпе çунаттисемпе çыхăнаççĕ. Çакă чăвашра авалтан пыракан йăлан – нимен – палли. Мĕншĕн тесен ку тăрăхра пурăнакансем мĕн ĕлĕкрен пысăк ĕçсене пĕрле, халăхпа, туса ирттереççĕ. Çурт-йĕр хăпартмалла-и, анкартинчи ялхуçалăх ĕçĕсем-и – туслă йышпа ĕç хăвăртрах ăнăçать.

Ĕçченлĕхпе тăрăшулăх, ăслăхпа йĕрке символĕ – пыл хурчĕ – çакна тĕп-тĕрĕс сăнлать. Гербра симĕс, сарă тата хĕрлĕ тĕссемпе усă курни те ăнсăртран мар: тырпулпа пахчаçимĕç, улма-çырла тĕсĕсем вырăнти халăх тĕпрен илсен ял хуçалăхĕпе тăрăшнине палăртаççĕ.

Кульцав ял поселенийĕнче те муниципаллă символсен эскизĕсене хатĕрленĕ. Вĕсене поселени депутачĕсен Пухăвĕн ларăвĕнче пăхса тухнă. Кульцав – ĕç паттăрĕсемпе мухтавлă тăрăх. Тырпул ÿстерсе пысăк тухăç илнĕшĕн вунвиççĕн Социализмла Ĕç Геройĕн хисеплĕ ятне тивĕçнĕ. Кульцав çавăн пекех тĕнчипе паллă опера юрăçин, СССР халăх артисчĕн М.Михайловăн çуралнă тăрăхĕ те. Шăпах хĕрлĕ тĕс – хăюлăхпа ĕç, пурнăç чечекленĕвĕн палли – тăван çĕр аталанăвне хăйсен ĕçĕпе, таланчĕпе пысăк тÿпе хывнă çынсене мухтать.

Герб çинче ÿкернĕ виçĕçулçăлăх (клевер çулçисем) – ĕненÿпе шанчăка, çĕр пулăхлăхĕпе ытлăх-çитлĕхе пĕлтерекен символ. Кăвак тĕспе Потаушка тата Кĕçĕн Çавал юханшывĕсене ытарлăн сăнланă.

ИринаЯКОВЛЕВА.