ЗАГС пайĕн информацийĕ тăрăх, кăçалхи 11 уйăхра гражданла тăрăм акчĕсене районта 943 шута илнĕ.

201-шĕ вĕсенчен савăнăçлă сăлтавпа – çут тĕнчене çĕнĕ çын килнипе – çыхăннă. Ку хисепрен 27 ача пĕччен амăшĕсен çуралнă, пĕр пепкен амăшĕ 18 çул та тултарман. Çав вăхăтрах ашшĕлĕхне çирĕплетсе 43 документа регистрациленĕ.

Шел те, пурнăçран уйрăлнисен шучĕ пысăкки – пăшăрхантаракан пулăм. Пĕлтĕрхи çак тапхăртипе танлаштарсан кăçалхи 11 уйăхра 61 çын ытларах вилнĕ – пурĕ 532. Çавăн пекех январь–ноябрь уйăхĕсенче 88 мăшăр официаллă майпа пĕрлешме кăмăл тунă, 72 çемье вара арканса кайнă. Ята улăштарас тесе ыйтса çырнисем те пулнă, пĕтĕмпе 7 заявление тивĕçтернĕ. 11 уйăхра ЗАГС пайĕ гражданла тăрăм акчĕсене тÿрлетÿсем тата улшăнусем кĕртессипе 86 заявлени пăхса тухнă, тепĕр хут 292 свидетельство хатĕрлесе панă, 947 справка çырнă.