Хĕрарăмсен уявĕн символĕ – хÿхĕм чечексем. Çут тĕнче чĕрĕлнин, ешерме тытăннин палли вăл. Ахальтен мар.

Этемлĕхĕн черченкĕ çурри хăй те çĕр çинче пурнăç парнелекен, илем кÿрекен хăватлă вăй-çке. Уяв кунĕнче вĕсен кашнин аллинче капăр чечек çыххисем пулма тивĕçлĕ.

Çавăнпах çул-йĕр инспекторĕсем те хĕрсемпе хĕрарăмсене уяв кăмăлĕ парнелеме йышăнни пачах тĕлĕнтермест. Чăваш енри ГИБДД сотрудникĕсем Раççейĕн кашни кĕтесĕнче иртнĕ «Автоледисене – чечексем» акцие хаваспах хутшăннă. Районти çул-йĕр хуралĕнче тăракансем те, ырă йăлана кĕнĕ тăрăх, «сăваплă» миссирен юлман. Ара, парне кÿресси штраф çырасси мар вĕт – пуриншĕн те кăмăллă. Мартăн 8-мĕшĕнче автоинспекци ячĕпе районти пикесене саламлас тивĕçе Андрей Траков аслă инспекторпа Алексей Порфирьев инспектор тулли кăмăл-туйăмпа пурнăçланă. Вĕсем руль умĕнче пыракан хĕрсене чарнă, кашнинех илемлĕ чечексем парнеленипе пĕрлех ăнăçлă та телейлĕ çул суннă. Хăюллă та хастар йĕрке хуралçисен саламĕсем нихăш автоледин чĕрине те хускатмасăр хăварман – пурте вĕсене чунтан ăшă сăмахсемпе тав тунă, пĕрле сăн ÿкерттернĕ. Тепĕр тесен, хĕрсен пит куçĕнче йăл кулă çиçни те – тав сăмахĕ вырăннех. Служба кăткăслăхне пăхмасăрах хавхаланупа ĕçлеме вăй-хăват парать.

Ирина ЯКОВЛЕВА.