Санарпуç вăтам шкулĕнчи В.Г.Михайлов ячĕпе хисепленекен «Çам-рăк пограничниксем» от-рядпа ГИБДД инспекторĕ Андрей Владимирович Траков тĕл пулчĕ.

«Çул çинчи хăрушсăрлăх пуринчен те килет: çуран çÿрекенсем те, руль умĕнче ларакансем те яваплă пулнинчен», – çакăн пек вĕрентÿллĕ сăмахсемпе пуçларĕ Андрей Траков калаçăва. Вăл Вăрнар районĕнчи çул-йĕр лару-тăрăвĕпе паллаштарчĕ, ачасен хăрушсăрлăхне тивĕçтерессине пысăк тимлĕх уйăрчĕ.

Час-часах, акă, кĕçĕннисем çул-йĕр правилисене пăснă пирки суранланса аманаççĕ. Пĕчĕк тимсĕрлĕх те пысăк инкек патне çитерме пултарать. «Пĕр самантра пурнăç улшăнать. Чи хакли – çын пурнăçĕ. Çакна ялан асра тытмалла», – терĕ инспектор.

Ременьпе çыхăнманни, çул çитмен ачасене ятарлă креслăсăр илсе çÿрени, руль умне ÿсĕрле ларни тата ытти правилăсене пăхăнманни те хăрушлăх кăларса тăратать. Андрей Владимирович мотоциклпа, мопедпа, скутерпа, мотоблокпа камăн, миçе çултан çÿреме юранине те тĕплĕн ăнлантарчĕ. Вĕренекенсем хăйсене кăсăклантаракан вун-вун ыйтăва пачĕç. Андрей Траков вĕсене туллин хуравласа тĕслĕхсемпе çирĕплетрĕ.

Вăл ачасене ăнăçу, лайăх вĕренме, спортпа туслашса пысăк çитĕнÿсем тума, çул-йĕр правилисене çирĕп пăхăнма сунчĕ.

Тĕлпулу кăсăклă иртрĕ, ачасем çĕннине нумай пĕлчĕç.