Чăваш ен Пуçлăхĕ Олег Николаев Раççей Президенчĕн общество йышăну пÿлĕмĕнче ирттернĕ йышăнура Вăрнарта пурăнакан Рада Ластухина хваттер нушипе пулнă.

Райцентрти икĕ хутлă, сакăр хваттерлĕ çурта 2017 çулхи кăрлачăн 1-мĕшĕччен авари пулма пултараканнисен шутне кĕртсе ĕлкĕрейменшĕн хĕрарăм вырăнти влаçсене ятлать: докуменчĕсем е çухалаççĕ, е тупăнаççĕ... 2020 çултах çĕнĕ хваттере куçас ĕмĕтпе пурăннă, çакă тÿрре тухман: «2022 çулта та пулин ыйту татăлĕ-ши;»

Олег Николаев халь граждансене авари пулма пултаракан çуртсенчен куçармалли 2024 çулчченхи программăпа ĕçленине çирĕплетнĕ. Мускав шантарать: регион çак программăна вăхăт çитичченех пурнăçласан асăннă ĕç валли хушма укçа уйăрĕç – юхăннă çуртсене авари пулма пултараканнисен шутне кĕртсе унти çынсене куçарма тÿр килĕ. Анчах Вăрнар, Çĕмĕрле, Куславкка тĕслĕхĕсенче Олег Алексеевич пурăнмалли çурт-йĕр ыйтăвне татса памалли ытти май та пуррине палăртнă. Çав шутра – хайхи юхăннă çуртпа юнашар пысăкрах урăх çурт çĕклесе.