Хĕл пирĕнтен уйрăлма васкамасть. Пĕлтĕр ку вăхăтра, сăмахран, шыв карласа юхнă пулсан, кăçалхи март халĕ те юрпа пуян-ха.

Ку, паллах, йĕлтĕрçĕсемшĕн аван. Вĕсен ăмăртусене йăлана кĕнĕ трассăсенчех хатĕрленме тата хутшăнма май пулчĕ. Канмалли кунсенче, акă, Шупашкарта «Весенняя капель» уçă первенство иртнĕ. Унта хамăр республикăри çеç мар, кÿршĕллĕ регионсенчи вăйлă йĕлтĕрçĕсем те тупăшнă.

Вăрнар район команди яланхиллех лайăх результатсемпе палăрнă. Хапăс шкулĕнче вĕренекен Данил Тикинев, Мария Гусева хăйсен ушкăнĕнче финиша пуринчен малтан çитнĕ. Услапа Нурăсри Алексей Афанасьевпа Кульцаври Владислав Тимофеев, Чăрăшкас Хирлепри Оля Скворцова бронза медальсене тивĕçнĕ.

Районăн ытти спортсменĕсем призлă вырăна лекмен пулин те чи вăйлă вунă йĕлтĕрçĕ йышне кĕнĕ: Катя Леонтьева тата Александр Тикинев (Вăрнарти 1-мĕш шкул), Ангелина Шумилова (Чăрăшкас Хирлеп), Святогор Петров (Шăхаль) тата Гавриил Гусев (Хапăс).  

Старта çавăн пекех Настя Николаева та тухнă. Вăл чи кĕçĕннисен ушкăнĕнче япăх мар ăмăртнă. Хĕрача поселокри 1-мĕш шкулта вĕренет.

Маларах та Вăрнар йĕлтĕрçисем ача-пăча спорт шкулĕсем хушшинче иртнĕ Чăваш ен первенствинче ăнăçлă ăмăртнă. Виççĕн тан çĕнтерÿ пьедесталĕн чи çÿллĕ пусми çине хăпарма тивĕçнĕ: Валентина Тикинева, Михаил Скворцов тата Карина Федорова.

Анастасия Тикиневапа Юлия Шляпкина кĕмĕл медальсене тивĕçнĕ.

Эстафетăра та вăрнарсем малта пынă. 2003–2004 çулсенче çуралнисем хушшинче Михаил Скворцов, Анастасия Тикинева (Хапăс), Карина Федоровапа Максим Максимов (1-мĕш шкул) 2-мĕш вырăн йышăннă.

2007–2008 çулсенче çуралнисен ушкăнĕнче Гавриил Гусевпа Мария Гусева (Хапăс), Владислав Тимофеев (Кульцав) тата Ольга Скворцова (Чăрăшкас Хирлеп) финиша 3-мĕш çитнĕ.

Ачасем Михаил Павлович Павлов тата Юрий Александрович Тикинев патĕнче ăсталăха туптаççĕ.  

Светлана ЧИКМЯКОВА.