Йĕпреçри тĕп библиотекăра Пĕтĕм Раççейри куç курманнисен обществин Вăрнарти организацийĕн отчетпа суйлав конференцийĕ иртнĕ.

Пĕлтерĕшлĕ мероприятие обществăн Чăваш енри председателĕ Юрий Сергеев, тĕп специалисчĕ Анастасия Андреева çитнĕ.

Отчетлă докладра пилĕк çулхи ĕç-хĕле пĕтĕмлетнĕ хыççăн делегатсем организацин малашлăх тĕллевĕсене палăртнă.

Куç курманнисен обществин Вăрнарти уйрăмĕн председательне Галина Мясниковăнах суйланă. Конференцие хутшăнакансем палăртнă тăрăх, Галина Михайловна пуçаруллă пулнине кура организаци пурнăçĕ питĕ кăсăклă. Тăтăшах тĕрлĕ конкурссем, тĕлпулусем иртеççĕ. Вăрнарти организаци республикăра чи лайăххисен шутĕнче. Курăмлă ĕç кăтартăвĕсемпе пĕрремĕш вырăна тухнă, Кубока тивĕçнĕ. Обществăлла ĕç-хĕле хастар пурнăçланăшăн вырăнти организацине   ЧР Ĕç тата социаллă хÿтĕлев министерстви, куç курманнисен республикăри уйрăмĕ тав тунă.

Юрий Сергеев Галина Мясниковăна «Куç курманнисен Пĕтĕм Раççейри обществи умĕнчи тава тивĕçлĕ ĕçсемшĕн» 2 степеньлĕ паллăпа чысланă. Каласа хăвармалла,   çак наградăн 3 степеньлĕ паллине Любовь Нестерова тивĕçнĕ. Çавăн пекех хастар ĕçченсене – Светлана Будановăна, Алина Ивановăна тата ыттисене, библиотека коллективĕсене обществăн республикăри тата вырăнти организацийĕсен Хисеп грамотипе чысланă.

Яланах пулăшма тăрăшнăшăн Галина Мясникова Вăрнар тата Йĕпреç районĕсен администрацийĕсене, социаллă тивĕçтерÿсен центрĕсене тав сăмахĕ каланă.