Иртнĕ эрне вĕçĕнче Вăрнарти пушарпа çăлав подразделенийĕн каллех инкек вырăнне тухса кайма тивнĕ. Раççей МЧС-ĕн республикăри Тĕп управленийĕн информацийĕ тăрăх, иртнĕ эрнекун 9 сехет те 30 минут тĕлĕнче Пăртас ялĕнчен пушар тухни çинчен пĕлтерÿ пулнă. Кунти пĕр хуçалăхра пурăнмалли çуртра вут-çулăм алхасма тытăннă-мĕн. Вăл мĕнле майпа тивсе илнине палăртассипе яваплă службăсем тимлеççĕ.

Кăçалхи кăтартусене илес-тĕк, инкексен пысăк пайĕ шăпах пурăнмалли çурт-йĕр секторĕнче пулни курăнать. Çавăнпа та пушар хуралĕн ĕçченĕсем кил-хуçалăхра çулăмпа асăрхануллă пулмаллине çине-çинех аса илтереççĕ. Усă куракан газ е электричество оборудованийĕн юсавлăхĕ, вĕсене хăрушсăр ĕçлеттересси, мунчасене правилăсене пăхăнса хутса ăшăтасси те тимлĕхрен тухмалла мар.

Пилĕк уйăхра республикăра пушарсем 382 хутчен алхаснă. Вĕсем кÿнĕ тăкак – 44 миллион ытла тенкĕ. 36 çын пурнăçĕ вăхăтсăр татăлнă, 39-ăн суранланнă.

Ирина ЯКОВЛЕВА.