«Пĕр кунтах, июнĕн 27-мĕшĕнче, шыв-шур объекчĕсенче икĕ пĕчĕк ачан пурнăçĕсем татăлнă. Хĕрлĕ Чутай районĕнче пиллĕкри хĕрача анкартинчи пĕвере путса вилнĕ, Çĕрпÿ тăрăхĕнче улттăри арçын ача – хăй пурăнакан вырăнпа юнашар юханшывра. Иккĕшĕ те инкек вăхăтĕнче аслисен тимлĕхĕнче пулман, ишме те пĕлмен. Унччен маларах та, июнĕн 22-мĕшĕнче, Çĕнĕ Шупашкарта саккăрти арçын ача Атăлта, шыва кĕме юраман вырăнта, путнă», – пĕлтереççĕ Раççей Следстви комитечĕн республикăри следстви управленийĕнчен.

Шел те, шăрăх хуçаланма тытăнсанах çакнашкал япăх хыпарсем килме тытăнчĕç. Пĕчĕккисем анчах мар, аслисем те инкеке лекнĕ тĕслĕхсем пур. Июнĕн 26-мĕшĕнче те çак сăлтавпа иккĕн пурнăçран вăхăтсăр уйрăлнă: Комсомольски районĕнче 52-ри хĕрарăм тата Çĕнĕ Шупашкарта 35-ри арçын. Юлашки тĕслĕхĕнче арçын ГЭС çывăхĕнче ÿсĕрле ишнĕ, çыранра каннă юлташĕсен куçĕсем умĕнчех шыв айне анса кайнă.

Çулла малашне те ăшă кунсемпе савăнтарĕ-ха. Нумайăшĕ чăнах та шăрăха шыв-шур хĕрринче чăтса ирттерме тăрăшать. Анчах тимлĕхе çухатсан синкерĕ юнашар çÿренине манма юрамасть – лайăх ишекен те япăххинчен сыхланаймасть.

Инкексенчен асăрханма МЧС-ăн республикăри управленийĕ çакнашкал сĕнÿсем парать:

- ятарласа хатĕрленĕ вырăнсенче кăна шыва кĕме юрать, вĕсенче çăлавçăсемпе медицина ĕçченĕсем те хуралта;

- хĕвеллĕ, çилсĕр çанталăкра, 17–19 градусран ăшăрах шыва кĕмелле, унта 10–15 минутран ытла тăмалла мар;

- палăртнă вырăнтан аякка ан ишĕр – малалла тăрук тарăнланма е сивĕ çăлкуç тапма пултарать, курăк чăтлăхĕнче ал-ура çыхланас хăрушлăх та пур;

- шывра пĕр-пĕрне ярса тытса, утланса выляма-аташма юрамасть – шыв çăтнипе чыхăнса тăн çухатасси те пулĕ.

Ашшĕ-амăшĕсене çăлавçăсем уйрăмах тимлесе ыйтаççĕ: ачасене куçран ан вĕçертĕр, шыв-шур хĕррине хăйсем тĕллĕн çÿреме ирĕк ан парăр, пĕрле чух та асăрхавран ан кăларăр.

Ирина ЯКОВЛЕВА.