Чăваш енĕн пĕрлештернĕ команди спорт туризмĕ енĕпе Раççей чемпионатĕнче каллех пысăк результатсем кăтартнă.

Çĕршывăн тĕп старчĕсем Белгородра иртнĕ, унта çуран дистанцире 19 регионти спортсменсем тупăшнă. Чăваш ен чысне хÿтĕлекенсен йышĕнче Вăрнар каччи, Раççей спорт мастерĕ Андрей Львов та пулнă.

Çамрăксен йывăр техника тапхăрĕсене тата тăрук улшăнса пыракан çÿллĕшсене пĕрлештерекен дистанцисене çĕнме тивнĕ. Андрей Львов вăрăм дистанцире кĕмĕл, кĕске дистанцире бронза медальсене çĕнсе илнĕ. Пĕтĕмĕшле вара иккĕмĕш результат кăтартнă.

Командăри тусĕпе Сергей Кузнецовпа вĕсем ку таранччен темиçе çитĕнÿ те тунă. Хальхинче те мăшăррăн ăмăртса вăрăм дистанцие чи малтан, кĕскине иккĕмĕш вĕçленĕ. Пĕрлехи очкосемпе вара вĕсем 1-мĕш вырăн йышăннă.

Ушкăнпа ăмăртса та пирĕн ентеш Чăваш ен командине ăнăçу кÿнĕ. Сергей Кузнецовпа, Андрей Беловпа тата Семен Машановпа пĕрле вĕсем икĕ дистанцире те иккĕмĕш пулнă. Пĕтĕмĕшле вара – çĕнтерÿçĕсем.

Ăмăртăвăн пĕтĕм тапхăрти кăтартăвĕсене кура Чăваш ен команди çĕнтерÿ пьедесталĕн 3-мĕш пусми çине хăпарма тивĕçнĕ.

Светлана ЧИКМЯКОВА.