Пуçаруллă бюджет программи яллă вырăнсенчи инфраструктурăна çĕнетме, тавралăха хăтлăлатма пулăшакан тĕп мелсенчен пĕри пулса тăчĕ.

Ун йĕркипе уйăракан укçа-тенкĕпе юлашки çулсенче вырăнти ыйтусем чылай татăлчĕç. Тĕпрен илсен, çулсем сарассипе, пĕвесене тасатассипе, территорисене йĕркене кĕртессипе, ыттипе. Паллах, программа пурнăçлавĕнче кунта пурăнакансем тĕп вырăн йышăнаççĕ: пĕрремĕшĕнчен – мĕнле ĕç чи пĕлтерĕшлине хăйсем палăртаççĕ, иккĕмĕшĕнчен – укçа-тенкĕ хывассипе пая кĕреççĕ.

Аçăмçырми ял поселенийĕн информацийĕ тăрăх, акă, ку тăрăхра кăçал пуçаруллă бюджет йĕркипе тăватă проекта ĕçе кĕртнĕ. Вĕсенчен пĕри – Тăвальушкăнь Ялтăрара. Кунта ял масарĕнче çĕнĕ çурт çĕклесе лартнă. Кăмпал çыннисен вара çивĕч ыйтусен шутĕнче пĕвесем юшкăнланни, типни пулнă. Çакă пушар хăрушсăрлăхне тивĕçтерме те чăрмав кăларнă. Программăна хутшăнни ялăн икĕ вĕçĕнчи икĕ пĕвене тасатса йĕркене кĕртме пулăшнă. Çавăн пекех тепĕр проектпа Уйкас Ялтăрари дамбăна та юсама май килнĕ.

Аçăмçырминчи Октябрьская урамра пурăнакансен пуçарăвĕпе çĕкленнĕ тепĕр объект – ача-пăча вăйă площадки. Вăл вырăнти ФАП çумĕнче вырнаçнă, кĕске вăхăтрах ачасем йышлă пухăнакан, спортра пиçĕхмелли тата выляв вырăнĕ пулса тăнă.

Çитес çул поселенире пуçаруллă бюджет йĕркипе виçĕ проектпа ĕçлесшĕн.

Ирина ЯКОВЛЕВА.