Совет Союзĕн Геройĕ Ф.Ашмаров ячĕллĕ Мăн Явăшри пĕтĕмĕшле пĕлÿ паракан вăтам шкулти ачасем çулсерен тĕрлĕ предметсемпе иртекен районти олимпиадăсене йышлăн хутшăнаççĕ. Хальхинче 17 предмета тарăннăн шĕкĕлче-рĕç, чи пултаруллисем çĕнтерÿпе таврăнчĕç.

Тăван чĕлхе хамăр халăха юратма вĕрентет, чун-чĕрере ăшă туйăмсем çуратать. Акă, мĕншĕн чăваш чĕлхине вĕрентессине шкулта тĕп вырăна хураççĕ. Ку шкулта чăваш чĕлхипе тата литературипе Ирина Николаевна Моисеева тарăн пĕлÿ парать. Çавăнпа ĕнтĕ олимпиадăра харăсах икĕ хĕрача чи нумай балл пухрĕç. 7-мĕш класри Алина Красновапа 8-мĕш класри Мария Сильвестрова тестри ыйтусем çине тĕрĕс хуравласа олимпиадăра пĕрремĕш вырăна тухнă.

Вĕренÿ программинче «Тăван ен культури» предмет та пур. Тĕпрен илсен, кунти материалсем тăван тавралăх культурипе, йăли-йĕркипе тачă çыхăннă. Çавăнпа вĕренекенсем уроксенче тăван ял историйĕпе тата культурипе çыхăннă  материалсемпе анлă усă кураççĕ. Чăваш ен культурине лайăх пĕлес, ăна тĕплĕн тĕпчес енĕпе 8-мĕш класри София Щекловапа Мария Сильвестрова хуравĕсем кăсăклă, тарăн шухăшлă пулнă. Жюри членĕсем иккĕшне те олимпиадăра чи пултаруллисем тесе йышăннă. Çак çитĕнÿре шкул директорĕн вĕрентÿ енĕпе ĕçлекен çумĕн Альбина Васильевна Павлован тÿпи уйрăмах пысăк.

Право предмечĕпе олимпиадăра 9-мĕш класри Анна Кошкина ытти ачасенчен тавçăруллăрах, тавракурăмлăрах пулнипе палăрнă.

Пĕтĕмлетсе калас-тăк, пилĕк вĕренекен республика шайĕнчи олимпиадăсенче тупăшма тивĕçнĕ. Вĕсем кунта та хăйсен тарăн пĕлĕвне пуренлĕн кăтартасса шанас килет.

– Учителĕн ĕçĕ-хĕлĕ, пĕлĕвĕ, ăсталăхĕ хăй вĕрентекен ачасен ăс-тăнĕнче калăпланни, пурнăç çулĕ çине тухма вăй-хăват пани савăнтарать, олимпиадăсенче малти вырăнсене йышăнма хистет, – терĕç шкул чысне çÿле çĕклеме пултарнисем.

В.МОСКВИН.