Цифра пĕлĕвĕн Вăрнарти «IT-Куб» центрĕ иртнĕ эрнекун шахмат турнирне йĕркеленĕ. Уçă турнир икĕ ÿсĕмре иртнĕ.

13–15 çултисем хушшинче чи çивĕччи Çĕрпел шкулĕнче вĕренекен Вадим Максимов пулнă. Призерĕсем – Вăрнарти 2-мĕш шкулти Константин Кротенков тата Михаил Сергеев.

16–18 çултисенчен шахматла пуринчен ăста выляканни – ял хуçалăх техникумĕн студенчĕ Игорь Еников. Çĕрпелти Андрей Иванов 2-мĕш, Вăрнарти 1-мĕш шкулти Максим Петров 3-мĕш вырăнсене тухнă.

– Ăмăрту пурне те савăк кăмăл парнелерĕ. Елена Иванова уйрăм предприниматель кашни ачашăн чунтан пăшăрханчĕ. Турнир вĕçĕнче ун çĕнтерÿçĕсем валли кăна мар, шахмат сĕтелĕ хушшинче тупăшнисем валли те парнесем тупăнчĕç, – пĕлтерчĕ «IT-Куб» директорĕ Алексей Фирсов.

«IT-Куб» çитес эрнере ачасене тата тепĕр тупăшăва – «Хакатон» программировани енĕпе районсем хушшинчи конкурса – йыхравлать. Унта 7–11-мĕш классем хутшăнма пултараççĕ.

Хамăр инф.