Аçăмçырми шкулне пĕтернĕ Ирина Васильевна Рысина (Алексеева) хăйĕн тăван тăрăхĕнче пулчĕ. Вăл Ярмушкара пурăнакан Г.Сорокинпа килĕнче курса калаçрĕ. Сăлтавĕ те тупăнчĕ: Геннадий Илларионович унăн класс ертÿçинче тата физкультура учителĕнче тăрăшнă. Тĕлпулăва ял тăрăхĕн ертсе пыракан специалисчĕ Л.Григорьева та хутшăнчĕ. Виççĕшĕ иртнĕ вăхăтсене аса илчĕç, паянхи ĕçсем патне те çитсе тухрĕç.

Ирина Васильевна Аçăмçырми ялĕнче çуралнă. Йышлă çемьере çитĕннĕ. Ашшĕ колхозра тимĕрçĕре, амăшĕ бригадăра ĕçленĕ. Хĕр шкулта спортăн темиçе тĕсĕпе туслашнă, уйрăмах çăмăл атлетикăна тата йĕлтĕрпе чупма килĕштернĕ. Сакăр класс пĕтерсен Челябинскри индустрипе педагогика училищине вĕренме кĕнĕ. Диплом илсен училищĕре токарь ĕçне вĕрентме тытăннă. Çав вăхăтрах Челябинскри индустрипе педагогика институтĕнче куçăмсăр майпа пĕлĕве тарăнлатнă. Тăваттăмĕш курсра качча тухнă. Мăшăрĕпе хĕрпе ывăла кун çути парнеленĕ.

Ачисене пăхса çитĕнтернĕ вăхăтра ĕçленĕ те, çăмăл атлетика енĕпе тренировкăсене те çÿренĕ. 35 çулта марафон чупăвне хутшăннă, 4-мĕш вырăн йышăннă. Ирина, çулсем кайсан та, спортран уйрăлман. 42 çулта тĕнче класлă спорт мастерĕ пулса тăнă.

Ăна Раççей командин йышне илнĕ. Голландире иртнĕ ăмăртура командăпа 1-мĕш вырăна тивĕçнĕ. Европа чемпионачĕсенче тата Тĕнче кубокĕнче 100 километрлă дистанцие парăнтарнă. Мускавра 220 километр чупнă. Австринче тĕнче чемпионки пулса тăнă. Чехире çичĕ куна пынă марафон чупăвĕнче 3-мĕш вырăна тухнă.

Хальхи вăхăтра пирĕн ентеш Курган хулинче тренерта ĕçлет. Ирина Васильевна хăйĕн вĕренекенĕсене çăмăл атлетика енĕпе ăсталăха туптама пулăшать.

Юрий КОРНИЛОВ.